Con Miembronan di Famia Ta Cooperá pa un Pleno Participacion—Na Reunionnan di Congregacion
1 Famianan cristian tin cu haci caso dje mandamentu pa reuní huntu na reunionnan di congregacion. (Heb. 10:24, 25) Si tin bon cooperacion, nan tur por prepará p’e reunionnan, asistí i participá na nan. Circunstancianan di cada famia ta diferente i ta varia. Tog, tin cosnan cu un esposo cristian, un esposa creyente of un mayor soltero por haci pa promové unidad familiar den asuntunan spiritual, sin importá cuantu mucha tin den e famia ni nan edad.—Pro. 1:8.
2 Saca Tempu pa Prepará: Miembronan di famia ta cooperá pa asina cada un por ta bon prepará p’e reunionnan di congregacion. Hopi famia ta trata e artículo di Toren di Vigilancia huntu p’e studio semanal. Algun ta prepará p’e Studio di Buki di Congregacion of nan ta haci e lesamentu semanal di Bijbel como famia. E obhetivo ta pa nan tin e puntonan importante na mente, promé cu bai reunion. Asina, nan tur lo saca mas beneficio di loke nan ta tende i nan lo por participá si e oportunidad presentá.—1 Tim. 4:15.
3 Planea pa Participá: Tur miembro dje famia mester tin como meta pa declará nan speransa dilanti otronan dor di duna comentario na reunion. (Heb. 10:23) Tin un miembro di famia cu tin mester di yudansa of animacion pa haci esaki? Ki yudansa cada un tin mester pa nan prepará e asignacionnan p’e Scol di Ministerio Teocrático? Esposanan ta apreciá si nan esposo mustra interes dor di kisas duna nan idea di un ilustracion cu ta pas den un parti of un marco di circunstancia práctico. Mayornan no mester sinti cu ta nan mester prepará e parti di nan yunan chikitu. Esei lo por sofocá iniciativa dje muchanan. Pero loke sí mayornan por haci ta, yuda e hóbennan i scucha nan ora nan ta practicá na bos haltu.—Efe. 6:4.
4 Organisá pa Asistí: Por siña e muchanan for di chikitu pa nan ta bistí i cla pa bai reunion na un ora stipulá. Miembronan di famia mester cooperá tambe den haci trabou di cas pa no tin tardansa.—Mira sugerencianan den e bukinan Felicidad den Famia, página 112, i Hovenan Sa Puntra, página 316-17.
5 Tantu mayor como yu por refleccioná riba e palabranan di Hosué di antigwedad, kende a bisa: “En cuanto ami i mi famia di cas, nos lo sirbi Jehova.” P’esei, laga nos tur keda determiná pa duna nos cooperacion pa nos tin pleno participacion n’e reunionnan di congregacion.—Hos. 24:15.