Bo Por Duna un Man?
1 Apostel Pablo a amonestá miembronan di congregacion pa nan “tin e mésun cuido pa otro.” (1 Cor. 12:25) Pues, nos mester mustra interes personal un den otro i keda dispuesto pa duna yudansa cu amor ora ta necesario. Considerá un ehempel. Algun dje ruman muhernan spiritual den nos seno ta lanta nan yunan den e berdad nan so. E rumannan aki ta hiba henter e carga di responsabilidad pa e entrenamentu spiritual di nan yunan. Sigur nan ta digno di nos animacion bondadoso i yudansa práctico “conforme cu nan necesidadnan.” (Rom. 12:13a) Bo por duna nan un man?
2 Maneranan cu Lo Bo Por Yuda: Ofrecé esnan cu ta dependé di transporte público un lift pa bai reunion i asamblea, por yuda e famia ei spar basta cen. Si nos yuda un mama atendé cu su yunan chikitu na reunion, esei ta nificá cu e por beneficiá mas plenamente dje programa. Mescos tambe, si nos ofrecé pa yud’é cu e muchanan ora nan sali den sirbishi di veld, esei por dun’é un poco alivio. Nos por tin un gran influencia positivo riba nos hóbennan, si nos mustra berdadero interes den nan dor di cera amistad cu nan. Invitá un famia di un solo mayor pa participá de bes en cuando den bo studio di famia; esei lo refrescá i lanta nan ánimo spiritual.
3 Sea Discreto: Nos mester tene cuidou pa no insistí pa yuda un persona cu no ta hañ’é necesario. Ni nos lo no kier mete den asuntunan personal dje famia ora nos ta duna nan e yudansa cu nan mester. Ta mas cu claro cu rumannan muher i parehanan casá ta den e mihó posicion pa duna un man na un ruman muher cu ta den necesidad.
4 Bijbel ta animá tur cristian pa “sigui e caminda di hospitalidad” un pa cu otro. (Rom. 12:13b) Un dje hopi maneranan cu nos ta demostrá e amor mescos cu di Cristo cu nos tin entre nos, ta dor di duna nos rumannan spiritual un man.—Juan 13:35.