Educacion Seglar i Bo Metanan Spiritual
1 Ora bo haña un bon educacion básico na yong, esei por duna bo e abilidadnan académico cu bo mester pa lesa i skirbi bon. Tambe bo ta haña un comprendimentu general di geografia, historia, matemática i ciencia. Den e proceso, bo por siña con pa pensa cla, analisá echonan, solucioná problema i generá ideanan productivo. Un educacion asina lo beneficia bo pa resto di bo bida. Con educacion seglar por tin un efecto riba bo metanan spiritual den bida, i yuda bo gana “sabiduria práctico i abilidad di pensa”?—Pro. 3:21, 22.
2 Bira Util den e Sirbishi di Dios: Miéntras cu bo ta bai scol, paga tinu den klas i haci bo huiswerknan bon. Si bo cultivá bon custumber di lesa i di studia, lo ta mas fácil pa bo examiná e Palabra di Dios i mantené bo mes spiritualmente fuerte. (Echo. 17:11) Un conocimentu amplio lo yuda bo sa con pa trata cu hende di diferente antecedente, interes i creencia, ora bo topa nan den e ministerio. E educacion cu bo ricibí na scol lo ta útil ora di efectuá bo responsabilidadnan cristian den Dios su organisacion.—Compará cu 2 Timoteo 2:21; 4:11.
3 Siña Mantené Bo Mes: Si bo haci bo best, bo por siña e abilidadnan necesario tambe pa gana bo pan despues cu bo caba scol. (Compará cu 1 Timoteo 5:8.) Scoge bo vaknan cuidadosamente. En bes di concentrá riba un tereno cu tin un cantidad limitá di cupo di trabou, pensa riba siña un ofishi of un abilidad special cu lo yuda bo haña trabou apropiado unda cu bo ta. (Pro. 22:29) Un educacion asina lo haci posibel cu bo por mantené bo mes, si un dia bo dicidí di bai sirbi caminda tin mas necesidad.—Echo. 18:1-4.
4 Haña un bon educacion básico miéntras cu bo ta bai scol por yuda bo expandé bo ministerio. Traha duru pa adkerí abilidadnan special cu ta necesario pa mantené bo mes miéntras bo ta progresá den Jehova su sirbishi. Dje manera ei bo educacion lo sirbi pa yuda bo alcansá bo metanan spiritual.