Bo Ta Bai Muda?
Ora e contesta riba e pregunta ei ta sí, tin hopi cos cu abo i otronan tin cu tuma e iniciativa pa haci. Dor di sigui e siguiente pasonan básico describí aki bou, lo bo ta establecí lihé den bo congregacion nobo.
(1) Una bes bo sa unda bo ta bai, e secretario di bo congregacion actual lo por obtené e adres dje Salon di Reino of di bo congregacion nobo. Ora bo yega n’e lugá, wak mesora unda e salon ta keda i confirmá e oranan di reunion di congregacion. Si tin mas cu un congregacion ta usa e Salon di Reino, puntra e ancianonan ta den teritorio di cua congregacion bo ta biba. No tarda pa asistí na reunion i cera conocí cu e ancianonan local.
(2) Tantu e secretario di bo congregacion actual como di esun nobo lo cooperá den translado di bo karchi di Registro di Publicadó di Congregacion i esnan di bo famia. Tambe nan lo manda un carta di introduccion na e ancianonan di bo congregacion nobo. (Mira e Caha di Pregunta di Nos Ministerio di Reino na spañó di februari 1991.) E Comité di Sirbishi di Congregacion caminda bo a muda bai mester notificá bo yegada na e conductor di studio di buki corespondiente, pa asina e por tuma contacto cu bo i yuda bo localisá bo grupo nobo di studio di buki.—Rom. 15:7.
(3) Tur publicadó den bo congregacion nobo tin un papel gososo pa cumpli cuné, esta, di cera conocí cu bo i laga bo sinti bon biní. (Compará cu 3 Juan 8.) Claro cu esaki ta nificá cu bo mester ta presente na e reunionnan pa asina bo por disfrutá di un intercambio animador i edificante cu e rumannan.
(4) Bo no mester warda te ora cu tur trabou enbolbí cu e mudansa ta cla, pa bo cuminsá sali den e ministerio di veld cu bo congregacion nobo. Segun bo ta pone interesnan di Reino na promé lugá, otro asuntunan lo ser atendé i lo bo sinti bo masha na cas den bo ambiente nobo. (Mat. 6:33) Ora bo ta establecí den bo cas nobo, casi sigur lo bo kier invitá algun ruman dje congregacion pa bin cerca bo i asina siña conocé otro mihó.—Rom. 12:13b.
Mudansa ta un proyecto grandi. Sin embargo, ora cu tur hende enbolbí haci loke ta ser recomendá, lo bo no cai atras spiritualmente. Boso tur lo keda cu bon impresion di nos amoroso hermandad cristian.