Kico Lo Bo Bisa un Moslim?
1 Bo a yega di duna testimonio na un moslim? Si ta asina, probablemente bo a ripará cu moslimnan ta kere den Dios cu fervor. Sin embargo, nan sa masha poco dje binidero Paradijs terenal cu Jehova su profetanan a predicí, i nos lo kier compartí e speransa ei cu nan. (1 Tim. 2:3, 4) E siguiente informacion lo yuda bo duna un bon testimonio.
2 Moslimnan ta kere den Alah, esta Dios, i nan ta kere cu Mohamed ta Dios su profeta. Nan buki santu ta Koran, i nan religion yama islam, cu ta nificá “sumision.” Koran ta bisa cu gañamentu i adoracion di imágen ta malu, cu tin un solo Dios i cu e no ta parti di un Trinidad. Tambe, e ta siña di inmortalidad di alma, fiernu di candela i un paradijs celestial. Moslimnan ta aceptá Bijbel como e Palabra di Dios, pero nan ta kere cu Bijbel a ser cambiá, miéntras cu Koran, cu ainda ta den su idioma original, a keda puru.
3 Sea Amigabel, Demostrá Tacto i Dicernimentu: Ora di combersá cu un moslim, sea amigabel i demostrá tacto. (Pro. 25:15) Tene na mente cu e creencianan di moslim ta firme ankrá i cu nan a siña mayoria di nan for di cabes. Pues, den moslimnan su desaroyo spiritual nan no a siña razoná riba siñansa religioso i proba pa nan mes kico ta e boluntad di Dios. (Rom. 12:2) Pa yuda moslim, pacenshi i comprension ta vital.—1 Cor. 9:19-23.
4 Evitá di usa expresionnan cu den mente di un persona moslim ta conectá bo cu cristiandad. Laga nan comprendé bon cla cu bo no ta parti di religion católico ni protestant, cu bo ta diferente. Referí na Bijbel como e Buki di Dios. Como cu moslim tin un repugnancia pa e término “Yu di Dios,” por lo general ta mihó pa no us’é ni papia dje tópico aki, sino te ora cu e persona a haci progreso spiritual. Sin embargo, bo por papia tocante Jesus, refiriendo na dje como un profeta of mensahero. Evitá di discutí. Si bo ripará cu e persona ta cuminsá rabia, den un forma cortes, bai mesora.
5 Ta mihó pa papia cu un persona so i no cu un grupo. Por lo general, ta consehabel pa hende muher predicá na hende muher, i hende homber na hende homber. Claro cu tin excepcionnan riba esaki, pero mester usa sano huicio. Tambe, hopi moslim ta sensitivo tocante loke nan ta considerá bistí i peñá inmoderá pa hende muher. Rumannan muher mester ta conciente di esaki.—1 Cor. 10:31-33.
6 Cosnan pa Papia di Dje: Papia francamente tocante e grandesa di Dios i di su amor. No vacilá pa bisa cu bo ta un berdadero creyente, cu tin un solo Dios (no un Trinidad) i cu adoracion di imágen ta malu. Papia tocante e maldad cu tin den mundu awe, cosnan manera guera, intrankilidad social, odio racial i e hipocresia cu ta bisto den asina hopi hende religioso.
7 E foyeto na ingles E Guia di Dios—Nos Caminda pa Paradijs lo duna bo un bista mas penetrante di tópiconan cu por usa pa habri combersacion cu moslim. E ta diseñá pa atraé moslim cu ta biba den un ambiente caminda kisas nan ta sinti nan liber pa studia Bijbel.
8 Como presentacion, lo bo por bisa:
◼ “Mi ta haciendo un esfuerso special pa papia cu personanan moslim. Mi tabata lesa tocante bo religion i mi ta kere cu ta corecto pa mi bisa cu moslim ta kere den un solo Dios berdadero i den tur e profetanan. [Permití un contesta.] Lo mi tin gana di papia cu bo tocante un profecia antiguo cu ta predicí e transformacion dje tera den un paradijs. Mi por lesa pa bo loke e profeta a skirbi? [Lesa Isaías 11:6-9.] E profecia aki ta pone mi corda un cita for di Koran cu tin den e foyeto aki.” Bai na página 9 dje foyeto Guia di Dios, i lesa e cita skirbí cu letter diki, cu ta bisa cu e hustunan lo heredá e tera. Si e persona mustra interes, sigui e combersacion dor di trata §7 pa 9 na página 8. Laga e foyeto, i haci areglo pa un rebishita.—Pa un otro presentacion, mira Nos Ministerio di Reino di februari 1998, página 6, §27.
9 Ora di invitá un persona pa considerá e foyeto Guia di Dios, ta mihó pa yam’é un consideracion i no un studio di Bijbel. Ora bo caba e foyeto, e studiante lo ta cla pa studia e foyeto Rekerí of e buki Conocimentu. Otro publicacionnan diseñá specialmente pa moslim ta e tratado na ingles Con pa Haña e Caminda pa Paradijs i e foyeto chikitu E Tempu pa Berdadero Sumision na Dios.
10 Cu loke nos sa awor di creencianan islámico i kico nan ta sensitivo p’e, nos por mustra dicernimentu ora di scoge ki literatura pa ofrecé personanan moslim i tambe den nos manera di duna nan testimonio. Jehova sigui bendicioná nos esfuersonan pa yuda tur clase di hende inbocá su nomber i ser salbá.—Echo. 2:21.