Kico Lo Bo Bisa un Ateista?
1 “Mi ta ateista,” un profesor di Polonia a bisa un misionero na Africa. Sin embargo, e ruman muher a logra tene un combersacion cu e señora i a dun’é e buki Bida—Con El A Presentá? Dor di Evolucion of Creacion? Ora e misionero a bolbe su siguiente siman, e profesor di cuné: “Mi no ta ateista mas!” El a lesa henter e buki Creacion i awor a pidi un studio di Bijbel. Kico abo por haci pa logra duna un testimonio na esnan cu ta bisa cu nan no ta kere den Dios? Promé, laga nos considerá e vários motibunan pakico hende ta bisa asina.
2 Factornan Cu Ta Pone Nan Keda sin Kere: No ta tur ateista a lanta ateista. Hopi di nan tabata exponé na un forma di religion i un tempu a kere den Dios. Sin embargo, problemanan serio di salú of di famia of cierto inhusticia cu nan a pasa aden, a debilitá nan fe. Pa otro hende, ta lesnan cu nan a haña na scolnan universitario tabatin un impacto negativo riba nan concepto di Dios. Tuma nota dje siguiente ehempelnan di hende ateista cu despues di tempu a desaroyá un creencia firme den Jehova Dios i a bira su Testigo.
3 Un señora na Paris a nace cu un malesa di wesu debilitante. Aunke el a bautisá católico, el a declará cu e ta ateista. Ora el a puntra e soeurnan pakico Dios a permitié nace cu un hendikep asina, nan contesta tabata: “Pasobra e stima bo.” El a nenga di aceptá e idea absurdo ei. Tuma tambe, un persona hóben na Finlandia cu dokternan a diagnosticá di tin un malesa muscular incurabel i a keda mará na rolstoel. Su mama a hib’é cerca un pentecostal cu a pretendé di cura hende enfermo. Pero no tabatin ningun curacion milagroso. Como resultado, e yoncuman a perde interes den Dios i a bira ateista.
4 Un homber na Hondúras a lanta católico pero a studia filosofia socialista i ateismo. Convencí dor dje siñansa universitario cu hende ta producto di evolucion, el a stop di kere den Dios. Asina tambe a pasa cu un señora na Merca. El a lanta metodista. Na universidad, el a tuma lesnan di sicologia. Con esaki a afectá su creencia? El a bisa: “Den un solo zomer nan a destruí tur e fe cu mi tabatin den religion.”
5 Alcansando Curason di Esnan Sincero: Hopi hende cu ta bisa cu nan no ta kere den Dios lo apreciá di sa si tin un solucion pa e problemanan di mal salú, conflicto den famia, inhusticia, etcétera. Nan ta sinceramente interesá pa haña contesta riba preguntanan manera: ‘Di con maldad ta existí?’ ‘Di con cos malu ta pasa cu bon hende?’ i ‘Kico ta e propósito di bida?’
6 Na Suisa, un homber cu su casá tur dos a lanta como ateista. Ora cu a papia cu nan pa promé bes tocante e berdad, nan reaccion tabata negativo. Pero nan tabatin problema familiar serio i tabata pensa pa divorciá. Ora e Testigo a bolbe bishitá nan, el a mustra nan for di Bijbel con pa vence nan problemanan. E pareha a keda stom dje conseho práctico cu tin den e Scritura, i nan a bai di acuerdo pa studia Bijbel. Nan matrimonio a bira fuerte, nan a progresá spiritualmente i a bautisá.
7 Loke Bo Por Bisa un Ateista: Ora un hende bisa bo cu e ta ateista, purba haña sa pakico e ta bisa esei. Ta debí na e educacion cu el a ricibí, e problemanan cu el a pasa den of debí na hipocresia religioso i siñansanan falsu cu el a mira? Lo bo por puntr’é: “Semper bo a pensa asina?” of “Pa ki motibu bo ta kere cu no tin Dios?” Su contesta lo yuda bo determiná kico pa bisa. Ora bo mester di argumentonan potente, e buki Tin un Creador Cu Ta Interesá den Bo? por ta net loke bo mester.
8 Bo por purba hiba un combersacion cu un ateista dor di puntra:
◼ “Bo a yega di puntra bo mes: ‘Si tin un Dios, pakico tin asina tantu sufrimentu i inhusticia na mundu?’ [Permití contesta.] Mi por mustra bo e punto di bista bíblico riba e tópico aki?” Lesa Jeremías 10:23. Despues di les’é, puntr’é su opinion dje texto. Anto mustr’é página 16 i 17 dje foyeto Hamas Lo Yega di Tin un Mundu Sin Guera? Of na lugá di esei, bo por usa capítulo 10 dje buki Creador. Invit’é pa aceptá e publicacion i lesa e informacion.—Pa mas sugerencia, mira e buki Razonamentu na spañó, página 122-4 [na ingles, página 150-1].
9 Ta berdad cu no ta tur ateista lo aceptá e berdad. Pero tin hopi cu sí ta dispuesto pa considerá un otro punto di bista. Usa lógica, persuasion i riba tur cos, e poder dje Palabra di Dios pa yuda nan mira e berdad.—Echo. 28:23, 24; Heb. 4:12.