Con pa Desaroyá e Abilidad di Razoná

¹ Un definicion dje palabra “razoná” ta: “papia cu un otro hende pa asina influenciá su accion of opinionnan.” Pa por mehorá bo eficacia den e ministerio, bo tin cu cultivá e abilidad di razoná cu hende cu bo ta topa. (Echo. 17:2-4) Pero con bo por desaroyá e abilidad aki?

² E Ta Cuminsá cu Meditacion: Ora bo ta studia berdadnan bíblico, lo bo ripará cu ta bon pa refleccioná riba e informacion. Si parti dje informacion ta parce algu complicá, tuma bo tempu pa investigá un poco i meditá riba e contestanan. Trata na comprendé bon cla no solamente e splicacionnan cu ta ser duná, sino tambe e motibunan bíblico pa e splicacionnan ei.

³ E Ta Encerá Preparacion p’e Ministerio: Pensa con lo bo splica e berdad na vários tipo di hende. Pa lanta interes, formulá un pregunta cu ta stimulá pensamentu. Determiná con pa conect’é cu un punto bíblico i razoná riba dje. Anticipá obhecionnan cu hende por bin cuné, i pensa riba con pa considerá nan. Indicá den e publicacion cu bo ta ofrecé un punto sobresaliente cu ta aplicá mihó.

⁴ Sigui e Ehempel di Jesus: Jesus a pone e mihó patronchi di razoná eficasmente for dje Scritura. Pa analisá con el a siña otronan, considerá e relato na Lucas 10:25-37. Ripará e proceso aki: (1) Dirigí atencion n’e Scritura ora bo ta contestá pregunta di hende. (2) Animá nan pa expresá nan mes, i encomendá nan ora nan comentá algu cu ta demostrá dicernimentu. (3) Haci sigur cu nan ta comprendé e relacion entre e pregunta i e textonan bíblico. (4) Usa un ilustracion cu ta toca e curason pa bo ta sigur cu e persona ta capta e berdadero sentido dje contesta.—Mira E Toren di Vigilancia [na spañó] di 1 di mart 1986, página 27-8, §8-10.

⁵ Usa e Herment Cu A Duna Nos: A publicá e buki Razonamentu for dje Scritura como un manual p’e ministerio di veld. Su introduccionnan, contestanan riba expresionnan cu por para combersacion i puntonan di razonamentu ta yuda nos desaroyá e abilidad di razoná. E buki Razonamentu ta un herment balioso cu semper nos mester tin huntu cu nos den sirbishi, i no vacilá pa us’é ora nos ta den combersacionnan bíblico. Repasá página 7 cu 8 dje buki pa mira con pa us’é n’e mihó manera.

⁶ Dor di desaroyá bo abilidad di razoná lo bo mehorá bo abilidad den e trabou di predicá i siña otronan. Esaki lo resultá den bendicionnan ricu pa bo i pa e hendenan cu bo topa den e ministerio.