“Keda Lantá”
1 Despues cu Jesus a describí e sucesonan crucial cu lo a marca e último dianan dje sistema di cosnan aki, el a urgi su disipelnan pa “keda lantá.” (Mar. 13:33) Di con cristiannan mester keda lantá? Pasobra nos ta bibando den e tempu mas peligroso den historia humano. Nos no por permití nos mes e luho di cabishá spiritualmente. Esei por pone nos keda sin apreciá e trabou cu Jehova a duna nos pa haci den e tempu di fin aki. Cua trabou esei ta?
2 Rond mundu Jehova ta lagando su pueblo proclamá e bon nobo tocante su Reino, e único speransa pa humanidad. E echo cu nos ta traha den estrecho cooperacion cu Dios su organisacion ta identificá nos como cristiannan berdadero, cu ta conciente dje tempu aki i dje necesidad pa yuda otro hende tende e “dichonan di bida eterno.” (Juan 6:68) Nos ta duna evidencia di ta lantá spiritualmente dor di participá cu celo den e trabou di sumo importancia aki.
3 Impulsá pa Predicá: Como Testigo di Jehova, nos mester ta positivo tocante nos ministerio. Amor pa Dios i pa próhimo ta impulsá nos personalmente pa participá den e trabou di predicá. (1 Cor. 9:16, 17) Dor di haci esei, nos lo salba nos mes i tambe esnan cu scucha nos. (1 Tim. 4:16) Laga nos determinacion ta pa participá mas regular posibel, i traha con largu cu ta necesario, den predicá tocante e mihó gobiernu cu humanidad hamas lo tin: e Reino di Dios!
4 Tin un echo importante cu ta imprimí den nos e urgencia di nos ministerio: comienso dje tribulacion grandi lo bini miéntras cu ainda nos ta ocupá den e trabou aki. Dor cu nos no sa e dia ni e ora, esei ta rekerí pa nos keda lantá i prepará na tur ocasion, dependiendo riba Jehova cu oracion. (Efe. 6:18) E alcanse dje actividad di predicá ta sigui expandé. Pero pronto, e trabou di duna testimonio di mas grandi den historia humano lo yega na un culminacion.
5 Sigui fielmente e mandamentu di Jesus pa “keda lantá.” Awor mas cu nunca esaki ta importante. Laga nos reaccioná cu un sentido di urgencia. Awe i tur dia, laga nos keda spiritualmente sobrio, alerto i activo den e sirbishi di Jehova. Sí, laga nos “keda lantá i mantené nos huicio.”—1 Tes. 5:6.