‘Probá en Cuanto Aptitud’—Con?
1 Cu e crecementu continuo den Jehova su organisacion, constantemente tin mester di rumannan homber cualificá pa sirbi como sirbidó ministerial. Mayoria ruman cu no ta nombrá ainda, incluso tienernan, tin un deseo di sirbi den e congregacion. Nan ta sinti nan útil i cu un sintimentu di logro ora asigná trabou extra na nan. Nan mester ser ‘probá en cuanto aptitud’ pa nan por sigui progresá. (1 Tim. 3:10) Ta con ta haci esei?
2 E Papel dje Ancianonan: Como parti di evaluá un ruman segun e cualificacionnan bíblico pa sirbidó ministerial cu nos ta haña na 1 Timoteo 3:8-13, e ancianonan lo test si un ruman homber ta apto pa carga responsabilidad. Podisé nan ta asign’é pa haci trabounan útil relacioná cu partimentu di revista i literatura, manehá microfon, mantencion di Salon di Reino, etcétera. E ancianonan lo observá con e ta reaccioná riba su asignacionnan i con e ta atendé nan. Nan lo busca pa wak si e ta un hende cu por dependé riba dje, puntual, diligente, modesto, cu un spiritu dispuesto i cu e abilidad di bai bon cu otronan. (Fil. 2:20) E ta ehemplar den su bistí i areglo personal? E tin un sentido di responsabilidad? Nan kier mira den “su conducta excelente su obranan cu un suavedad cu ta pertenecé na sabiduria.” (Sant. 3:13) Di berdad e ta haci esfuerso pa yuda den e congregacion? E ta cumpli cu Jesus su mandato di “haci disipel di hende” dor di participá celosamente den e ministerio di veld?—Mat. 28:19; mira E Toren di Vigilancia na spañó di 1 di september 1990, página 18-28.
3 Aunke Bijbel no ta fiha un edad mínimo pa nombra un ruman sirbidó ministerial, e ta referí na rumannan asina como “hombernan cu ta sirbi.” Nos lo no verwagt pa nan ta hóbennan na comienso of meimei di edad tiener, foral dor cu ta mencioná e posibilidad cu nan tin casá cu yu. (1 Tim. 3:12, 13) Hombernan asina no mester ta entregá na “e deseonan cu ta pertenecé na hubentud,” pero mester ta comportá nan mes den un manera serio, cu un bon reputacion i concenshi limpi dilanti Dios i hende.—2 Tim. 2:22.
4 Aunke ta útil pa un persona tin abilidad natural, loke realmente ta conta ta su actitud i spiritu. Un ruman homber ta deseá di alabá Dios humildemente i ser na servicio di su rumannan? Si ta asina, Jehova lo bendicioná su esfuerso pa haci progreso den e congregacion.