“Nos No Por Stop di Papia”
1 Jesucristo ta observá e trabou di predicá cu sumo atencion. (Mat. 28:20; Mar. 13:10) Aunke tin casi seis miyon proclamadó activo ta duna testimonio den 234 pais, nos no tin cu asumí cu nos trabou di duna testimonio a terminá. Tanten cu Dios no bisa cu e trabou ta cla, “nos no por stop di papia” tocante e cosnan cu nos a siña.—Echo. 4:20.
2 Dependé Riba e Spiritu di Dios: Satanas ta pone hopi preshon pa desanimá nos. (Rev. 12:17) Nos mes carni imperfecto tambe ta afligí nos cu hopi problema. E cosnan ei por distraí nos atencion for dje trabou sumamente importante di predicá. No obstante, si nos confia den Jehova, su spiritu lo yuda nos enfrentá cualkier obstáculo.
3 Ora e congregacion cristian di promé siglo a confrontá persecucion severo, e rumannan a haci oracion pidi Dios yuda nan sigui papia su palabra cu hopi curashi. Jehova a contestá nan oracion dor di yena nan cu su spiritu i duna nan e celo i determinacion necesario pa sigui predicá. Como resultado, nan a sigui declará e bon nobo cu curashi, sin baha man.—Echo. 4:29, 31; 5:42.
4 No Tene Miedu di Papiamentu Negativo: Podisé opinion general of publicidad calumnioso tin tendencia di intimidá nos. Sin embargo, corda riba e declaracion yen di curashi cu Pedro i e otro apostelnan a haci dilanti Sanedrin, cu ta pará skirbí na Echonan 5:29-32. Manera Gamaliel, e maestro di Ley a admití, hende no por para e trabou di Dios. E no ta ser efectuá mediante nos poder. E gran trabou aki tin e respaldo di Dios, i ta e so por logr’é!—Zac. 4:6.
5 Laga nos suplicá Jehova tur dia pa su spiritu yuda nos proclamá e bon nobo cu celo. Mare nos por bisa, mescos cu Jeremías, cu e mensahe di Reino ta manera un candela ardiente den nos wesunan. (Jer. 20:9) Nos no por keda ketu!