“Laga Tur Cos Sosodé pa Edificacion”
1 Ora nos ta trata cu nos rumannan, nos mester haci loke ta bon pa nan edificacion. Esaki ta nificá ser profundamente interesá den protehá nan interesnan spiritual. Si nos trabou seglar ta encerá promové un cierto producto of servicio, nos tin cu tene cuidou pa nos no haci nada cu lo trompecá nos rumannan.—2 Cor. 6:3; Fil. 1:9, 10.
2 Tin ruman a bai participá den vários negoshi riscante, concentrando riba compañeronan cristian como posibel cliente. Cierto organisacionnan di benta ta animá nan agentenan pa mira tur hende como un posibel cliente, incluso esnan cu ta pertenecé na nan religion. Tin ruman a organisá reunionnan grandi di Testigo cu e propósito di animá nan pa participá den un proyecto comercial. Otronan ta promové nan negoshi riscante dor di manda artículo, foyeto, informacion riba Internet of caset, pa compañeronan di fe cu no a pidi esei. Lo ta corecto pa un cristian usa su contactonan teocrático pa probechá di su rumannan spiritual? No!—1 Cor. 10:23, 24, 31-33.
3 Rumannan Mester Tene Cuidou: Esaki no kier men cu un cristian no por haci negoshi cu un ruman. Esei ta un asuntu personal. Sin embargo, tin ruman ta bin cu proposicionnan di negoshi cu ta stimulá golosidad, i nan ta animá nan compañeronan creyente pa bira nan partner of pa invertí den e negoshi. Hopi dje negoshinan riscante aki ta fracasá, costando e participantenan sumanan grandi di placa. Maske esnan cu a djoin den e proyecto kisas a ser motivá pa un deseo di traha placa lihé, e organisadó no mester sinti cu e ta liber di culpa si e negoshi fracasá. Di antemano e mester considerá cuidadosamente con e bienestar spiritual i físico di su rumannan lo ser afectá den caso cu e negoshi riscante no bai bon. Foral e rumannan cu tin puesto di responsabilidad teocrático mester tene cuidou cu nan actividadnan seglar, pasobra podisé otro rumannan ta respetá nan i ta pone hopi confiansa den nan. Lo ta robes pa abusá dje confiansa ei. Un ruman por perde su privilegionan di sirbishi sagrado si otronan perde respet p’e.
4 Nos meta mester ta pa “laga tur cos sosodé pa edificacion.” (1 Cor. 14:26) Nos tin cu evitá di haci cualkier cos cu ta introducí of promové actividadnan comercial den e congregacion. Cosnan asina no tin nada di haci cu nos motibu bíblico pa reuní huntu.—Heb. 10:24, 25.