“Mi Mester Muda?”
1 Reaccionando riba e mandato di Jesus pa “bai . . . haci disipel di hende di tur nacion,” hopi sirbidó dedicá di Jehova a muda bai sirbi caminda tin mas necesidad. (Mat. 28:19) Nan ta imitá Pablo, kende a respondé n’e yamada: “Pasa pa Macedonia i yuda nos.” (Echo. 16:9) Con por haci esaki den un manera práctico?
2 Bai Stap pa Stap: Bo congregacion tin teritorio cu casi no ta ser trahá? Si ta asina, lo bo por concentrá bo esfuerso den e teritorionan ei. Promé cu bo dicidí di bai un otro caminda, consultá cu bo ancianonan pa wak si nan ta haña cu bo ta ekipá pa haci un mudansa asina. Tambe lo bo por puntra bo superintendente di circuito si e sa di un congregacion cercano caminda lo bo por expandé bo ministerio. Di otro banda, despues di a calculá e gastu cuidadosamente, kisas bo ta deseá di yuda den un otro parti dje pais of na otro tera. Si esaki ta bo deseo, abo huntu cu bo cuerpo di anciano mester skirbi un carta pa e oficina di sucursal caminda bo ta interesá di sirbi, describiendo bo antecedente teocrático. Lo ta sabí pa bishitá e lugá promé cu bo dicidí si bo ta muda permanentemente of no.
3 Tene Cuidou cu Imigrá: Un cantidad creciente di nos rumannan ta mudando pa otro tera debí cu nan ta buscando sea un mihó nivel di bida of alivio for di opresion. Den e proceso, nan a bira víctima di personanan sin escrúpulo cu ta primintí di yuda nan establecé den e tera nobo, pero cu ta djis tuma nan placa i despues bandoná nan. Den algun caso e personanan aki a asta purba obligá e imigrantenan haci trabou inmoral. Ora nan nenga, ta laga nan pa nan cuenta den e pais cu nan a drenta. Asina e situacion dje imigrantenan a bira pió di loke e tabata den nan patria. Talbes nan tin cu asta pidi e rumannan alohá nan i yuda nan cu otro cos, poniendo asina un carga riba otro famianan cristian cu ta luchando cu nan propio problema i dificultadnan. Tal mudansanan imprudente a separá miembronan di algun cas físicamente for di otro, i a debilitá famianan spiritualmente.—1 Tim. 6:8-11.
4 Si bo kier muda pa adelanto personal, tene na mente cu unda cu bo bai biba, tin problema pa enfrentá. Ta mas fácil pa superá problema caminda ya caba bo conocé e idioma i cultura, en bes di cuminsá di nobo den un ambiente desconocí.