Teme Jehova Henter Dia
1 “E temor di Jehova ta e principio di sabiduria.” (Sal. 111:10) E ta stimulá nos pa haci bon obra i ta yuda nos apartá di loke ta malu. (Pro. 16:6) E temor aki ta un respet i admiracion profundo pa nos Creador cu ta impulsá nos pa evitá di desagrad’é i desobedec’é. Temor di Jehova ta algu cu nos tin cu cultivá i desplegá henter dia.—Pro. 8:13.
2 Tur dia, e spiritu dje mundu di Satanas ta ehercé tremendo preshon riba nos pa adaptá na su camindanan malbado. (Efe. 6:11, 12) Nos carni imperfecto ta pecaminoso i di naturalesa ta incliná na loke ta malu. (Gal. 5:17) Pues, pa nos por obedecé e mandamentunan di Jehova, ser felis i gana bida, nos tin cu teme Jehova henter dia.—Deu. 10:12, 13.
3 Hebreonan 10:24 i 25 ta consehá nos sinceramente pa reuní huntu pa asina animá otro “tantu mas” durante e tempu aki cu nos ta biba aden. Asistencia regular na reunion ta vital si nos kier sobrebibí e último dianan aki. Nos temor di desagradá Dios ta impulsá nos pa asistí na reunion i duna hopi balor na nan propósito. Esnan cu ta teme Dios ta mira participacion den reunionnan cristian como un privilegio sagrado.
4 Un otro manera cu nos ta desplegá nos temor di Dios ta dor di obedecé e mandamentu di predicá e bon nobo di Reino. (Mat. 28:19, 20; Echo. 10:42) Un meta principal di nos trabou di predicá ta pa yuda otro hende cultivá temor di Jehova i someté nan mes na su boluntad. Nos ta logra esaki dor di haci rebishita, purba cuminsá studio di Bijbel i despues siña otronan tur e mandamentunan di Dios. Asina nos ta demostrá nos temor di Jehova i nos amor pa próhimo.—Mat. 22:37-39.
5 Esnan cu no ta teme Dios ta keda sin desaroyá un actitud apreciativo pa cosnan spiritual, i nan ta sucumbí na mundu su aire, esta, su actitud mental mortal. (Efe. 2:2) Laga nos determinacion firme ta pa “rindi na Dios sirbishi sagrado . . . cu temor di Dios i respet profundo.” (Heb. 12:28) Dje manera ei nos lo cosechá e bendicionnan cu t’ei pa esnan cu ta teme Jehova henter dia.