E Bèrdat Tokante Futuro

Bo a yega di puntra bo mes kiko ta spera nos den futuro? Beibel ta bisa ku pronto algun suseso importante lo tuma lugá ku lo afektá nos tur.

Hesus a splika kon nos lo por sa “ku e Reino di Dios ta serka.” (Lukas 21:31) El a profetisá ku lo bai tin, entre otro, guera grandi, temblor fuerte, skarsedat di kuminda i epidemia. Esei ta presis loke ta pasando awendia.—Lukas 21:10-17.

Beibel ta bisa tambe ku den e “último dianan” di gobernashon humano e hendenan lo komportá nan mes malu. Bo por lesa e profesia ei na 2 Timoteo 3:1 pa 5. Siguramente bo ta di akuerdo ku e palabranan akí ta deskribí e aktitut i komportashon di hende ku ta rònt di nos.

Kiko esaki ta nifiká? Wèl, ku aki poko tempu e Reino di Dios lo trese kambio grandi ku lo hasi nos bida aki riba tera hopi mas mihó. (Lukas 21:36) Den Beibel, Dios a primintí kos bon pa tera i pa tur hende ku lo biba riba dje. Ban wak algun ehèmpel.

BON GOBERNASHON

“I na dje [Hesus] a wòrdu duna dominio, gloria i un reino, pa tur pueblo, nashon i hende di tur idioma por sirbié. Su dominio ta un dominio eterno ku lo no pasa nunka, i su reino ta un ku lo no wòrdu destruí.”—DANIEL 7:14.

Loke esaki ta enserá: Dios a establesé un gobièrnu mundial ku ta superior na tur otro gobièrnu, i ku Hesus komo Rei. Bou di e gobièrnu akí, nos lo por ta felis pa semper.

BON SALÚ

Un hobensita ta baha for di su ròlstul i ta kana

“Ningun habitante lo no bisa: ‘Mi ta malu.’”—ISAÍAS 33:24.

Loke esaki ta enserá: Nos lo no sufri di ningun inkapasidat i nos lo no bira malu. Nos lo tin e oportunidat di biba sin muri nunka.

PAS MUNDIAL

“E ta hasi gueranan stòp te na e fin di tera.”—SALMO 46:9.

Loke esaki ta enserá: Lo no tin menasa di guera mas i lo no tin tur e sufrimentu ku guera ta kousa.

LO TIN BON HENDE TUR KAMINDA

“E malbado lo no t’ei mas . . . E humildenan lo heredá e tera.”—SALMO 37:10, 11.

Loke esaki ta enserá: Lo no tin hende malbado mas, sino solamente esnan ku ke obedesé Dios.

HENTER TERA LO TA UN PARADEIS

“Nan lo traha kas i biba den nan; tambe nan lo planta kunukunan di wendrùif i kome nan fruta.”—ISAÍAS 65:21, 22.

Loke esaki ta enserá: Henter e tera lo bira bunita. Dios lo kontestá nos orashonnan, esta pa su boluntat sosodé “riba tera.”—Mateo 6:10.