Con pa Persuadí Otro Hende
1 Apostel Pablo a haña e reputacion di ta un minister persuasivo. (Echo. 19:26) Asta rey Agripa a bis’é: “Den poco tempu lo bo persuadí mi pa bira un cristian.” (Echo. 26:28) Kico a haci Pablo su ministerio asina persuasivo? El a razoná lógicamente for dje Scritura, i a adaptá su argumentonan na su oyentenan.—Echo. 28:23.
2 Imitando Pablo, nos tambe mester ta persuasivo den nos ministerio. Con? Dor di demostrá perspicacia ora di papia cu otro hende i ora di scucha nan. (Pro. 16:23) Tres paso importante lo yuda nos logra esaki.
3 Scucha Cuidadosamente: Segun cu e otro persona ta papia, scucha pa bo haña un base comun pa traha ariba. Si e plantia un obhecion, purba dicerní e motibu tras di esei. Ta bon pa bo sa precis kico e ta kere, di con e ta kere esei i kico a convenc’é di esei. (Pro. 18:13) Cu tacto saca for dje persona kico e ta pensa.
4 Haci Pregunta: Si un persona bisa cu e ta kere den Trinidad, lo bo por puntra: “Semper bo a kere den Trinidad?” Despues bisa: “Bo a yega di haci un estudio cabal di loke Bijbel ta bisa dje tópico ei?” Tambe lo bo por puntra: “Si Dios tabata parti di un Trinidad, nos no por verwagt cu Bijbel lo a bisa esei bon cla?” E contestanan cu bo ricibí lo yuda bo razoná cu e persona riba loke e Scritura ta bisa.
5 Usa Razonamentu Sano: Un Testigo a puntra un señora cu tabata kere cu Jesus ta Dios: ‘Si bo kier a purba ilustrá cu dos persona ta igual cu otro, ki relacion di famia lo bo a usa?’ E señora a contestá: “Por ta lo mi usa dos ruman homber.” E Testigo a agregá: “Tal bes asta ohochi idéntico. Pero ora Jesus a siña nos pa mira Dios como e Tata i e mes como e Yu, ki mensahe e tabata transmitiendo?” E señora a capta e punto cu un ta mas bieu i tin mas autoridad. (Mat. 20:23; Juan 14:28; 20:17) E Testigo a toca su mente i curason cu e arte di persuasion.
6 Claro cu no ta tur hende ta receptivo pa e berdad, maske con lógico i exacto nos presentacion por ta. Pero mescos cu Pablo, laga nos ser diligente den busca pa haña esnan di curason onrado den nos teritorio, i persuadí nan pa aceptá e mensahe di Reino.—Echo. 19:8.