“Pa Dios Tur Cos Ta Posibel”
1 E trabou principal dje congregacion cristian ta di predicá e mensahe di Reino mundialmente. (Mat. 24:14) Esei ta un tremendo tarea. Den bista di hopi observadó, esei ta rekerí recursonan fuera di loke nos tin. Tin otronan cu no por imaginá nan cu nos por cumpli cu e asignacion aki, ya cu nos ta confrontá bofon, oposicion i persecucion. (Mat. 24:9; 2 Tim. 3:12) Hende sképtico ta convencí cu ta imposibel efectuá e trabou aki. Sin embargo, Jesus a bisa: “Pa Dios tur cos ta posibel.”—Mat. 19:26.
2 Ehempelnan Positivo Cu Nos Por Imitá: Jesus a cuminsá su ministerio como un solo hende contra henter mundu. Den un intento pa strob’é di logra éxito, su opositornan a somet’é na tur humiyacion imaginabel, i finalmente a lagu’é muri un morto agonisante. Pero tog na final, Jesus a declará cu confiansa: “Ami a vence mundu.” (Juan 16:33) Realmente un logro increibel!
3 E disipelnan di Jesus a desplegá e mésun spiritu i celo yen di curashi den e ministerio cristian. Hopi di nan a ser sutá, batí, encarcelá i asta matá. Pero tog nan tabata ‘alegrá pasobra nan a ser considerá digno di ser desonrá pa causa di su nomber.’ (Echo. 5:41) Aunke tur cos tabata contra nan, nan a logra e tarea aparentemente imposibel di predicá e bon nobo “te na e parti mas lehano dje tera.”—Echo. 1:8; Col. 1:23.
4 Con pa Por Tin Éxito den Nos Tempu: Nos tambe ta haciendo e trabou di predicá e Reino cu aparentemente tur cos contra nos. Apesar di prohibicion dje obra, persecucion, encarcelacion i otro intentonan violento pa stop nos, nos ta logrando. Con por ta posibel? “ ‘No pa medio di un forsa militar, ni pa medio di poder, sino pa medio di mi spiritu,’ Jehova di ehércitonan a bisa.” (Zac. 4:6) Cu e respaldo di Jehova, nada por stop nos trabou!—Rom. 8:31.
5 Ora nos ta predicá, nos no tin motibu pa ta tímido of di tin miedu of sinti nos inadecuá. (2 Cor. 2:16, 17) Nos tin motibunan sobresaliente pa sigui padilanti den plama e bon nobo di Reino. Cu Jehova su yudansa, nos lo logra lo “imposibel”!—Luc. 18:27.