Duna Testimonio Como un Bon Bisiña
1 Jesus a bisa pa “stima bo próhimo mescos cu bo mes.” (Mat. 22:39) Sin duda bo ta “obra loke ta bon” pa cu bo compañeronan creyente, pero lo bo por expandé bo amor pa cu esnan cu ta bo bisiña? (Gal. 6:10) Den ki maneranan?
2 Dor di Identificá Bo Mes: Bo bisiñanan sa cu bo ta un Testigo? Si no ta asina, di con no pasa cerca nan durante sirbishi di veld? Kisas e resultado lo sorprendé bo! Of purba duna nan testimonio informal si bo ta sinti bo mas cómodo cu esei. Ora bo ta pafó kisas bo ta mira nan ta traha den nan curá of ta cana keiru riba caya. Acercá nan cu un sonrisa amabel. Purba papia tocante bo creencianan, unda e Salon di Reino ta situá i kico ta tuma lugá einan, i laga nan sa ken mas den bario ta bai einan. Invitá nan pa reunion. Sea decididu pa duna testimonio cabal dje bon nobo na tur hende cu bo conocé.—Echo. 10:42; 28:23.
3 Dor di Bo Conducta Ehemplar: Bo conducta amigabel ta bisa hopi cos di bo i por habri caminda pa duna un testimonio. Tambe e ta ‘dorna e siñansa di Dios.’ (Tito 2:7, 10) Mustra berdadero interes den bo bisiñanan. Sea amigabel i comprensivo. Respetá nan derecho di tin privacidad i un ambiente trankil. Si un di nan bira malu, mustra consideracion i ofrecé pa yuda. Ora un famia nobo muda bini den e bario, pasa cerca nan i yama nan bon biní. Tal actonan di bondad ta laga un impresion faborabel atras i ta agradá Jehova.—Heb. 13:16.
4 Dor dje Aparencia di Bo Propiedad: Ser un bon bisiña ta incluí cuida bo cas pa e ta presentabel. Un cas i curá limpi i atractivo ta un testimonio riba nan mes. Pero un cas sushi of cu tin yen di cos bieu bentá den curá, probablemente lo rebahá e mensahe di Reino. Pues ta masha importante pa mantené bo cas, curá i autonan limpi i den bon condicion.
5 Desplegá interes pa esnan pafó dje congregacion cristian ta un demostracion di amor pa bo próhimo. Kico lo por ta e resultado? Por ta masha bon cu ‘como testigo ocular di bo obranan excelente,’ algun di nan lo “glorificá Dios.”—1 Ped. 2:12.