Participá Plenamente den e Cosecha
1 Jehova su profetanan di pasado i tambe Jesucristo mes a papia di un trabou di recogementu. (Isa. 56:8; Eze. 34:11; Juan 10:16) E trabou ei ta ser efectuá awor segun cu ta predicá e bon nobo di Reino rond mundu. (Mat. 24:14) E distincion entre esnan cu ta sirbi Dios i esnan cu no ta sirbié ta birando hopi bisto. (Mal. 3:18) Kico esaki ta nificá pa nos?
2 Un Responsabilidad Personal: Nos por siña for dje ehempel di Pablo, kende tabata plenamente enbolbí den hiba delantera den e ministerio cristian. El a sinti cu e tabatin e obligacion di predicá pa asina tur hende por a haña e oportunidad di tende e bon nobo i ser salbá. Esaki a impuls’é pa traha sin stop na nan fabor. (Rom. 1:14-17) En bista dje situacion peligroso cu humanidad ta confrontá awe, nos no mester sinti asta un mayor responsabilidad pa predicá n’e hendenan den nos teritorio asigná?—1 Cor. 9:16.
3 Tempu pa Accion Urgente: Nos por compará e trabou di predicá cu un operacion di rescate. Mester localisá e hendenan i yuda nan yega na siguridad promé cu ta muchu lat. Tempu ta limitá. Bida ta den wega! No ta straño anto cu Jesus a urgi su disipelnan pa “roga e Doño dje cosecha pa manda trahadó na su cosecha.”—Mat. 9:38.
4 Reconociendo e urgencia cu tin awe, hopi trahadó di Reino a aumentá nan participacion den e actividad salbador di bida aki. Un tiener cu yama Hirohisa, tabata biba den cas huntu cu su mama i cuater ruman mas yong. El a yuda sostené su famia dor di lanta tres or di mainta pa parti korant. Asina mes, Hirohisa kier a haci mas den e ministerio, pues el a cuminsá traha como pionero regular. Tin maneranan cu abo lo por participá mas plenamente den e trabou aki cu nunca mas lo ser ripití?
5 “E tempu cu a keda ta reducí.” (1 Cor. 7:29) P’esei, laga nos haci tur loke nos por den e trabou di mas importante cu ta ser efectuá awe riba tera: predicá e bon nobo di Reino i haci disipel. Jesus a compará e ministerio aki cu un trabou di cosecha. (Mat. 9:35-38) Dor di participá plenamente den e cosecha, kisas un dje frutanan di nos labor lo ta, yuda un persona bira parti dje multitud grandi di adoradó describí na Revelacion 7:9 i 10.