Alcansá Curason di Bo Studiante
1 Promé cu Jesus a subi na shelu, el a bisa su disipelnan pa siña otro hende “warda” tur loke el a manda. (Mat. 28:19, 20) Pa un persona “warda” e mandamentunan di Cristo, e informacion tin cu alcansá su curason. (Sal. 119:112) Con bo por motivá e curason di un persona cu bo ta studiando Bijbel cuné?
2 Pidi Jehova Su Guia den Oracion: Haci disipel ta Dios su trabou. Pa por tin éxito, ta su bendicion ta necesario, i no nos abilidadnan. (Echo. 16:14; 1 Cor. 3:7) Pues, ta esencial pa den oracion nos pidi Jehova yuda nos siña otro hende e berdad.—Isa. 50:4.
3 Dicerní Kico e Studiante Ta Kere: Dor di ta al tanto di kico hende ta kere i di con nan ta kere esei, nos por haña e perspicacia pa sa kico pa bisa pa yega na nan curason. Di con un studiante ta gusta un cierto siñansa? Kico a convenc’é cu e siñansa ei ta creibel? Sabiendo esei por yuda nos papia cu dicernimentu.—Echo. 17:22, 23.
4 Desaroyá un Argumento Lógico i Bíblico: E berdad mester ta lógico pa e studiante. (Echo. 17:24-31) Nos mester duna un motibu sólido pa nos speransa. (1 Ped. 3:15) Sin embargo, haci esei semper den un manera bondadoso i cu pacenshi.
5 Reforsá Nos Siñansa cu Ilustracion: Ilustracionnan no solamente ta hacié mas fácil pa e studiante comprendé, sino tambe ta touch nan emocion. Ilustracion ta influenciá tantu mente como curason. Jesus a usa nan hopi bes. (Mar. 4:33, 34) Claro cu pa e ilustracion ta eficas, e mester cuadra cu e punto cu ta ser considerá i e mester tin di haber cu e bida dje studiante.
6 Mustra e Beneficionan di Aceptá e Berdad: Hende kier sa kico ta e beneficionan di aplicá loke nan ta siña. Yuda bo studiante mira e sabiduria dje palabranan di Pablo na 2 Timoteo 3:14-17.
7 No desanimá si algun studiante no reaccioná riba bo siñansa. No ta tur curason ta receptivo. (Mat. 13:15) Sin embargo, tin hende cu sí ta bira creyente. (Echo. 17:32-34) Nos ta spera cu bo esfuersonan pa alcansá curason di hende cu e bon nobo por yuda hopi hende mas aceptá i “warda” loke Jesus a manda.