Prepará pa Studia e Profecia di Isaías!
1 “Adoradónan fiel por tin confiansa cu Jehova . . . lo no permití e mundu di Satanas existí ni un dia mas di loke husticia ta rekerí.” Esta un declaracion animante! For di unda e ta citá? E Profecia di Isaías—Lus pa Henter Humanidad I. E profecia di Isaías ta duna nos motibu pa saca tal conclusion alentador? Sí! Den e buki bíblico ei, e tema di salbacion ta bini bon cla padilanti. (Isa. 25:9) P’esei pa nos lo ta un gran animacion di por studia e porcion aki dje Palabra di Dios na Studio di Buki di Congregacion. Nos lo t’ei tur siman pa disfrutá di dje? Di con nos mester t’ei?
2 Na Isaías 30:20, Jehova ta ser yamá nos “Magnífico Instructor.” Cada cristian mester scucha cu sumo atencion ora Jehova ta papia cu nos via e páginanan di su Palabra i via publicacionnan basá riba Bijbel cu “e esclabo fiel i discreto” ta percurá. (Mat. 24:45; Isa. 48:17, 18) Esaki sigur ta conta pa e buki E Profecia di Isaías I. Con bo por saca lo máximo for dje studio?
3 Prepará pa Participá: Apartá suficiente tempu tur siman pa prepará p’e studio di buki. Lesa e material asigná paragraf pa paragraf. Pensa riba cada pregunta imprimí. Marca e contestanan den bo buki. E versículonan citá for di Isaías ta skirbí cu letter diki. Lesa nan cu sumo atencion. Pa loke ta e otro textonan mencioná den e paragraf, busca nan pa wak con nan ta relacioná cu e informacion. Meditá riba loke bo ta siñando. Anto compartí e resultadonan di bo preparacion cu bo grupo di studio di buki.
4 E ruman cu ta conducí e studio di buki mester yuda tur presente haci bon uso di Bijbel i comprendé e balor práctico dje informacion cu ta ser tratá. Si abo haña beurt pa duna e promé comentario, duna un contesta simpel i directo. Si un otro hende a duna e promé contesta, abo por elaborá riba e punto cu ta ser considerá. Kisas bo por mustra con un texto clave ta apoyá e tema. Purba comentá cu bo mes palabra, i disfrutá dje goso di participá den e consideracion.
5 Laga nos examiná ansiosamente e mensahe precioso cu tin den e buki di Isaías. Lo e animá nos pa biba cada dia den expectativa gososo di Jehova su salbacion!—Isa. 30:18.