Manehá e Palabra di Dios Corectamente
1 Dunando testimonio na un funcionario, “Felipe a habri su boca i, cuminsando cu [un cierto Scritura], el a declará na dje e bon nobo tocante Jesus.” (Echo. 8:35) Felipe tabata “manehando e palabra dje berdad corectamente.” (2 Tim. 2:15) Sin embargo, superintendentenan biahero djawendia a ripará cu tin hopi publicadó cu masha poco bes ta usa Bijbel ora di duna testimonio. Abo ta usa bo Bijbel den e ministerio?
2 E Palabra di Dios ta e fuente di tur loke nos ta kere i ta siña hende. (2 Tim. 3:16, 17) T’e ta loke ta atraé hende na Jehova i ta educá nan pa haña bida. P’esei ta importante pa nos usa nos Bijbel den e ministerio en bes di djis combersá tocante tópiconan cu ta interesá nos. (Heb. 4:12) Debí cu mayoria hende no sa hopi di Bijbel, nos tin cu lesa for di dje pa mustra nan e guia práctico cu e ta ofrecé i e futuro cu e ta presentá pa humanidad.
3 Lesa Direct for di Bijbel: Podisé bo por purba bai predicá sin un tas grandi di sirbishi. Lo bo por pone e literatura cu bo kier ofrecé den un map plat i tene bo Bijbel den bo man of den bo sacu. Anto ora bo haña un persona pa combersá cuné, bo por saca bo Bijbel sin laga e persona sinti cu bo ta bai purba dun’é un sermon. Posicioná bo mes di tal manera cu bo oyente por lesa huntu cu bo den bo Bijbel. Kisas bo por pidié lesa un versículo na bos haltu. E informacion ta haci mas impresion riba dje si e mes por mira loke Bijbel ta bisa en bes di djis tend’é for di abo. Ta claro cu bo tin cu enfatisá e palabranan cu ta transmití e idea, pa yud’é comprendé e punto dje texto.
4 Un Presentacion cu Un Solo Texto: Despues di introducí bo mes lo bo por bisa: “Hende ta acudí na vários fuente pa guia den nan bida. Segun abo, kico ta e mihó fuente pa guia práctico? [Permití e persona contestá.] Kico bo ta pensa dje declaracion aki? [Lesa Proverbionan 2:6 i 7, i permití e persona contestá.] Sabiduria humano a comprobá di ta deplorablemente deficiente, hibando hopi hende na desesperacion. Ma e sabiduria di Dios, semper a duna prueba di ta confiabel i probechoso.” Anto mustra e persona e publicacion cu bo ta ofrecé, i destacá den dje un ehempel di Dios su sabiduria práctico.
5 Jesus a usa e Scritura pa yuda hende di curason onrado. (Luc. 24:32) Pablo a usa Bijbel pa proba hende e cosnan cu el a siña nan. (Echo. 17:2, 3) Nos lo tin mas confiansa i goso den e ministerio segun cu nos ta bira mas ábil den manehá e Palabra di Dios corectamente.