Bendishon Riku pa Esun Ku Ta Sembra Generosamente
1 Nos tur ta anhelá pa mira e gran promesanan ku tin den e Palabra di Dios kumpli. Pero for di awor Yehova ta perkurá hopi bendishon ku ta duna nos bida mas goso. Sin embargo, ta e esfuerso ku nos ta hasi ta determiná kuantu benefisio nos lo saka personalmente. Manera apòstel Pablo a bisa: “Esun ku sembra generosamente lo kosechá generosamente tambe.” (2 Kor. 9:6) Konsiderá dos área den kua e prinsipio aki ta aplikabel.
2 Nos Sirbishi Personal: Si nos kompartí e bon nobo ku otro hende ki ora ku nos haña un chèns di duna testimonio, esei ta trese hopi rekompensa. (Pro. 3:27, 28) Hopi ruman ta sembra generosamente dor di partisipá mas tantu den sirbishi, entre otro, trahando komo pionero ousiliar òf regular. Esei ta algu digno di elogio. Nos tur por sembra generosamente dor di hasi rebishita diligentemente pa kultivá tur interes ku nos haña i dor di ofresé un studio di Beibel ki ora ku oportunidat presentá. (Rom. 12:11) E tipo di esfuersonan aki ta resultá den eksperensianan ku ta animá nos i nos ta haña mas goso den nos sirbishi.
3 Apoyá e Reino di Dios: Pablo tabata papia tokante “sembra generosamente” en konekshon ku nos aporte material. (2 Kor. 9:6, 7, 11, 13) Awe, tin hopi manera ku nos por apoyá e Reino di Dios físikamente i materialmente. Nos por yuda ku konstrukshon di Salonnan di Reino i Salonnan di Asamblea. Tambe nos por pone nos mes disponibel pa yuda limpia i mantené e lugánan aki di adorashon berdadero. Ademas, nos por kontribuí finansieramente pa kubri e gastunan di e kongregashon lokal i tambe ku e obra mundial di prediká e Reino i di hasi disipel. Segun ku nos tur ta duna nos aporte, nos ta alegrá mashá ora nos mira e bendishon abundante ku Yehova ta drama riba e obra aki ku el a manda nos hasi!—Mal. 3:10; Luk. 6:38.
4 E Palabra di Dios ta animá nos ‘pa hasi bon, pa ta riku den bon obra, pa ta generoso i dispuesto pa kompartí.’ Si nos hasi kaso di e konseho ei, nos lo disfrutá di bendishon riku for di awor. Na mesun tempu, nos ta “montoná pa [nos] mes e tesoro di un bon fundeshi pa futuro [i] bida bèrdadero.”—1 Tim. 6:18, 19.