Yuda Otronan Glorifiká Yehova
1 Un mensahe vital ta ser proklamá na hende rònt mundu: “Teme Dios i dun’é gloria, pasobra e ora di su huisio a yega; i adorá Esun ku a traha shelu i tera i laman i fuentenan di awa.” (Rev. 14:6, 7) Pa nos ta un onor di por partisipá den e proklamashon aki. Kiko hende mester sa tokante Yehova pa nan por tem’é i ador’é?
2 Su Nòmber: Hende mester por distinguí entre e úniko Dios berdadero i tur e otro diosnan falsu ku ta ser adorá awendia. (Deu. 4:35; 1 Kor. 8:5, 6) Por sierto, e hòmbernan ku a skirbi Beibel a usa Yehova su nòmber ilustre mas ku 7000 bes. Ounke tin bes nos ta wak bon ki ora pa kuminsá usa e nòmber di Dios ku un hende, nunka nos no mester ten’é skondí ni ser tímido pa us’é. E boluntat di Dios ta pa henter humanidat siña konosé su nòmber.—Sal. 83:18, NW.
3 Su Personalidat: Pa hende por glorifiká Yehova, nan mester sa ki klase di Dios e ta. Nos mester laga nan sa tokante su gran amor, su sabiduria sin igual, su hustisia perfekto i su poder total, i tambe di su miserikòrdia, su bondat amoroso i su otro kualidatnan maravioso. (Éks. 34:6, 7) Tambe nan mester siña haña un temor saludabel di Dios, sinti rèspèt profundo p’e, i rekonosé ku asta nan bida ta dependé di Yehova su aprobashon.—Sal. 89:7.
4 Hala Serka Dios: Pa hende por skapa e huisio di Dios ku ta na kaminda, nan mester invoká Yehova motivá dor di fe. (Rom. 10:13, 14; 2 Tes. 1:8) Esei ta enserá mas ku djis siña konosé Dios su nòmber i su kualidatnan. Nos mester yuda hende desaroyá un relashon personal ku Yehova i konfia den dje ku tur nan kurason. (Pro. 3:5, 6) Segun ku nan praktiká loke nan siña, akudí na Dios den orashon sinsero i mira kon e ta yuda nan den nan bida diario, nan fe lo krese, i esei lo yuda nan hala serka Yehova.—Sal. 34:8.
5 Laga nos deklará Dios su nòmber ku selo, i yuda otro hende pone nan pleno konfiansa den dje i tem’é. Kisas ainda nos tin chèns di yuda hopi hende mas siña konosé Yehova i glorifik’é komo nan ‘Dios di salbashon.’—Sal. 25:5.