Proklamá e Mensahe di Reino
1 “Mi mester prediká e reino di Dios . . . , pasobra ta pa e propósito aki mi a wòrdu mandá.” (Luk. 4:43) Ku e palabranan ei Hesus a identifiká e tema di su sirbishi: e Reino di Dios. E mensahe ku nos ta proklamá awe tambe ta konsentrá riba e Reino, manera Hesus a profetisá na Mateo 24:14: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.” Kua ta e bèrdatnan tokante e Reino di Dios ku hende mester tende?
2 E Reino di Dios ta goberná aktualmente for di shelu i pronto lo remplasá tur gobièrnu humano. Diabel a ser saká kaba for di shelu, i e mal sistema di kosnan aki a drenta su último dianan. (Rev. 12:10, 12) E sistema di kosnan malbado di Satanas lo ser destruí kompletamente, pero e Reino di Dios lo no tambaleá. Lo e keda pa semper.—Dan. 2:44; Heb. 12:28.
3 E Reino lo satisfasé e deseonan sano di tur hende obediente. E ta bai eliminá e sufrimentu kousá pa guera, kriminalidat, opreshon i pobresa. (Sal. 46:8, 9; 72:12-14) Lo tin abundansia di kuminda pa tur hende. (Sal. 72:16; Isa. 25:6) Malesa i desabilidat lo ta kosnan di pasado. (Isa. 33:24; 35:5, 6) Segun ku humanidat ta bira perfekto, nan lo transformá e tera den un paradeis, i hende lo biba huntu den armonia.—Isa. 11:6-9.
4 Nos ta demostrá ku nos kier ta siudadano di e Reino di Dios na e manera ku nos ta biba awor. E mensahe di Reino mester influensiá henter e rumbo di nos bida, inkluso nos metanan i prioridatnan. Por ehèmpel, ounke nos tin e obligashon di perkurá pa nos famia, nos no por laga preokupashonnan material hoga e interesnan di Reino. (Mat. 13:22; 1 Tim. 5:8) Mas bien, nos tin ku obedesé Hesus su konseho: “Ma buska promé e reino di Dios i su hustisia, i tur e kosnan aki [e nesesidatnan material di bida] lo wòrdu añadí na boso.”—Mat. 6:33.
5 Ta urgente pa hende tende i aktua riba e mensahe di Reino miéntras tin tempu ainda. Laga nos yuda nan dor di “konvensé nan tokante di e kosnan di e reino di Dios.”—Echo. 19:8.