Kòrda Riba Esnan Fiel di Mayor Edat
1 Ana tabata un biuda di 84 aña, i apesar di su edat avansá ‘nunka e tabata falta tèmpel.’ Su fieldat a motivá Yehova pa dun’é un rekompensa spesial. (Luk. 2:36-38, NW) Awe tin hopi ruman ku ta demostrá e mesun aktitut ku Ana tabatin apesar ku nan ta konfrontá sirkunstansianan difísil. Tin biaha e rumannan fiel aki ta sinti nan desanimá ora nan tin ku lucha ku problemanan di salú òf ku limitashonnan debí na edat avansá. Laga nos konsiderá algun manera práktiko ku nos por animá nan i yuda nan mantené un bon rutina spiritual.
2 Reunion i Sirbishi: Hopi ruman fiel di mayor edat por asistí mas fásilmente na reunionnan kristian si otro rumannan amorosamente yuda nan ku transpòrt. Asistensia regular ta fortifiká e sirbidónan fiel aki di hopi tempu spiritualmente i e kongregashon tambe ta benefisiá. Abo a yega di duna un man den e obra ekselente aki?—Heb. 13:16.
3 Un partisipashon regular den sirbishi di vèlt ta duna kristiannan berdadero goso i satisfakshon. Pero pa hende di mayor edat i pa esnan enfermo kisas ta difísil pa partisipá regularmente. Ta posibel pa bo laga un di e rumannan stimá aki bai ku bo komo “kompañero-di-trabou” den algun rasgo di e predikashon? (Rom. 16:3, 9, 21) Kisas lo bo por invit’é pa partisipá huntu ku bo den dunamentu di testimonio via telefòn òf pa bai ku bo na un rebishita òf un studio di Beibel. Si e ruman di edat no por sali for di kas, ta posibel pa e studiante di Beibel bin na su kas pa studia?
4 Studia i Asosiá: Tin rumannan ku de bes en kuando ta invitá un ruman di edat òf un ruman enfermo pa sinta den nan studio di famia, i tin biaha nan ta asta tene e studio di famia na kas di e personanan ei. Un mama a bai ku su dos yu chikínan na kas di un ruman muhé di edat pa nan studio den Mi buki di relato bíblico, i nan tur a ser animá dor di e asosiashon. Rumannan di edat ta gusta tambe ora invitá nan pa bin kome òf pa un otro okashon sosial. Si esnan enfermo ta muchu suak pa haña bishita largu, lo bo por djis hasi un yamada òf un bishita kòrtiku i lesa pa nan, hasi orashon ku nan òf konta nan un eksperensia edifikante.—Rom. 1:11, 12.
5 Yehova tin masha apresio pa rumannan fiel di mayor edat. (Heb. 6:10, 11) Nos por imit’é dor di ekspresá nos apresio pa nan i dor di yuda nan mantené un bon rutina spiritual.