“Traha Lugá P’e”
1 Un biaha, ora Hesus tabata papia ku su disipelnan tokante matrimonio, el a menshoná ku solteria ta ‘un don.’ Despues di esei el a bisa: “Laga esun ku por traha lugá p’e traha lugá p’e.” (Mat. 19:10-12, NW) Algun aña despues, apòstel Pablo a skirbi tokante e bentahanan ku un soltero tin i a animá otro kompañeronan den fe pa sigui su ehèmpel di keda soltero. (1 Kor. 7:7, 38) Hopi ta esnan ku awe a “traha lugá” pa solteria i ta disfrutá di bentahanan ku esaki ta trese kuné. Kiko ta algun di e bentahanan aki?
2 Sirbi na un Manera “Kompletamente Dediká”: Pablo a komprondé ku solteria a dun’é oportunidat pa sirbi Yehova na un manera “kompletamente dediká.” Awendia ta e mesun kos. Un ruman hòmber soltero por hasi esfuerso pa bai Skol di Entrenamentu Ministerial, i un hende soltero generalmente ta mas liber pa bira pionero, siña un otro idioma, bai na un kongregashon kaminda tin mas nesesidat, sirbi na Bètel òf pone su mes disponibel pa otro privilegionan spesial di sirbishi. Kisas e tin mas tempu i chèns pa hasi studio personal profundo i pa meditashon i pa papia íntimamente ku Yehova den un orashon sinsero. Un persona soltero hopi bes tin mas tempu pa ofresé yudansa na otro hende. Tur e aktividatnan ei ta pa su “mes bon.”—1 Kor. 7:32-35; Echo. 20:35.
3 Tal sirbishi dediká òf sin distraishon na Dios ta trese rekompensa na abundansia. Despues ku un ruman muhé soltero tabatin 27 aña na Kenia, el a skirbi: “Mi tabatin asina tantu amigu i masha hopi trabou! Nos tabata hasi kos huntu [i] bishitá otro. . . . Mi por a usa e èkstra libertat i mobilidat ku un soltero tin pa keda okupá den sirbishi, i esaki a hasi mi hopi felis.” El a sigui bisa: “Atraves di e añanan mi relashon ku Yehova a bira mas mihó.”
4 Traha Lugá P’e: Hesus a bisa ku e motibu pa kultivá e don di solteria mester ta “pa kousa di e reino di shelu.” (Mat. 19:12) Manera ta e kaso di kualkier don òf regalo, mester usa solteria na un manera adekuá pa e trese goso i benefisio. Dor di probechá di e oportunidatnan ku solteria ta trese kuné i dor di konfia den Yehova pa sabiduria i forsa, hopi soltero a bin komprondé ku ta bale la pena pa traha lugá pa e don aki.