Konstrukshon Internashonal di Salòn di Reino den Algun Pais Europeo
1 Algun dékada pasá e obra di Testigunan di Yehova den vários pais europeo, inkluso Ost Europa, tabata restringí. Den mayoria kaso, tabatin restrikshonnan basta severo. Tabata difísil pa tene reunion abiertamente, i kasi imposibel pa usa un Salòn di Reino. Sin embargo, último añanan Yehova “a hasi kosnan grandi pa nos; p’esei nos ta kontentu.”—Sal. 126:3.
2 Kuminsando na 1983, gobièrnunan a kuminsá slèk e gara opresivo ku nan tabatin riba Testigunan di Yehova. Pa 1989, Polonia i Hungria a otorgá Testigunan di Yehova rekonosementu legal. Na 1991, Rusia a permití Testigunan di Yehova registrá legalmente. Djei padilanti, e obra a prosperá na Rusia i na e repúblikanan di eks-Union Soviétiko. Entre mart 1996 pa òktober 1998, Kuerpo Gobernante a aprobá 359 petishon pa fiansa pa traha Salòn di Reino ku sukursalnan ku ta supervisá 11 pais europeo a entregá.
3 Segun ku bo ta wak e potrètnan den e suplemento aki, meditá riba e kosnan grandi i maravioso ku Yehova a hasi pa su pueblo. (Sal. 136:4) Lo bo ta kontentu pa mira kon útil e kontribushonnan di e hermandat mundial ta, demostrando asina loke Hesus a deklará na Juan 13:35: “Na esaki tur hende lo sa ku boso ta mi disipel, si boso tin amor un pa otro.”
4 Rumania ta entre e paisnan europeo ku a benefisiá di e areglo pa yuda konstruí Salòn di Reino den paisnan di poko rekurso, i nan a traha 36 Salòn di Reino di yüli 2000 te ku awor. Dor di usa un modèl standard pa kasi tur nan Salònnan di Reino, Ukrania a traha 61 na aña 2001 i 76 mas na 2002. Ku yudansa di e plaka kontribuí na e Fondo di Salòn di Reino, sentenáres di Salòn di Reino a ser trahá na Bulgaria, Kroasia, Masedonia, Moldova, Rusia i Yugoslavia.
5 Den algun pais no ta fásil pa traha Salòn di Reino, i mester hasi hopi esfuerso promé ku kuminsá ku e trabou di konstrukshon mes. Hopi bes e preparashon pa konstrukshon ta tuma masha hopi tempu. Tambe ta muchu mas karu pa traha un Salòn di Reino den e parti ei di Europa ku den hopi parti di Afrika òf Suramérika. Sin embargo, debí na e gran oumento den e kantidat di adoradó di Yehova, ainda tin mester di sentenáres di Salòn di Reino den paisnan europeo di poko rekurso!
6 Ta masha maravioso mes pa mira asina un oumento rápido den e konstrukshon di e Salònnan di Reino aki! I manera e hopi eksperensianan ta demostrá, nan tabata un ekselente testimonio den e barionan kaminda a konstruí nan. Den algun área, outoridatnan lokal a keda impreshoná pa e rumannan su aktitut dispuesto pa sigui e reglanan di konstrukshon.
7 Isaias aptamente a profetisá tokante e oumento di adorashon berdadero den e tempu aki. Mediante e profeta ei Yehova a bisa di antemano: “Na su debido tempu, ami, SEÑOR, lo pura hasi esaki.” (Isa. 60:22) E último dékada sigur a demostrá ku ta Yehova su tempu pa trese oumento den Ost Europa. Nos ta spera ku Yehova lo sigui drama su bendishon riku riba nos esfuersonan pa pura e konstrukshon di Salònnan di Reino den hopi pais, segun ku nos ta sigui apoyá e Fondo di Salòn di Reino! Esaki lo tin komo resultado ku lo por traha hopi Salòn di Reino mas den paisnan di poko rekurso. Tambe lo e kontribuí na e kresementu di adorashon puru den hopi parti di Europa i ku un testimonio mas grandi lo ser duná te “na e finnan di mundu.”—Echo. 13:47.
[Pictures on page 3]
Kompleho di Salòn di Reino Moskú, Rusia
[Pictures on page 4-6]
Salònnan di Reino Nobo na Ost Europa
Strumica, Masedonia
Daruvar, Kroasia
Sokal, Distrito Lviv, Ukrania
Bitola, Masedonia
Mladost, Bulgaria
Plovdiv, Bulgaria
Kurdzhipskoye, Maykop, Rusia
Bački Petrovac, Yugoslavia
Tlumach, Distrito Ivano-Frankivsk, Ukrania
Rava-Ruska, Distrito Lviv, Ukrania
Stara Pazova, Yugoslavia
Zenica, Bosnia i Herzegovina
Sokal, Distrito Lviv, Ukrania
Zhydachiv, Distrito Lviv, Ukrania