E Palabra di Dios Ta Bèrdat
1 “Bo palabra den su totalidat ta bèrdat,” e salmista a skirbi. (Sal. 119:160) Mediante su Palabra inspirá, Yehova ta duna kontesta konvinsente pa e preguntanan mas importante di bida. E ta ofresé konsuelo i speransa na hende ku tin problema. I e ta mustra nos kon nos por hala serka dje. Un señora gradisidu a bisa: “Siña e bèrdat for di Beibel ta manera sali for di un lugá masha skur i tristu i drenta un kuarto kla, briante i agradabel.” Abo ta hasi esfuerso pa kompartí e bèrdat di e Palabra di Dios na tur oportunidat?
2 Beibel Su Poder di Transformá Hende i Su Atrakshon Universal: Bèrdat bíbliko tin e poder di motivá kurason i transformá bida. (Heb. 4:12) Un mucha muhé ku yama Rosa a hañ’é enbolbí den prostitushon, alkoholismo i droga. El a konta: “Un dia, ora mi tabata profundamente desesperá, un pareha Testigu a papia ku mi tokante kon Beibel por yuda nos solushoná nos problemanan. Mi a kuminsá studia e Palabra di Dios, i mi a hañ’é fasinante. Dentro di un luna mi tabatin e fortalesa pa kuminsá un bida nobo i moralmente limpi. Awor ku mi tabatin un propósito den bida, mi no tabatin nodi dependé mas riba alkohòl òf droga. I komo ku mi a deseá asina tantu pa ta Yehova su amiga, mi tabata determiná pa biba segun su normanan. Si no tabata p’e sabiduria práktiko di e Palabra di Dios, mi tin sigur ku pa awor aki lo mi a pone un fin na mi bida.”—Sal. 119:92.
3 Distinto for di mayoria buki djawe, Beibel ta atraé hende di ‘tur nashon, tribu, pueblo i lenga.’ (Rev. 7:9) E boluntat di Dios ta “pa tur klase di hende wòrdu salbá i yega na un konosementu eksakto di e bèrdat.” (1 Tim. 2:4, NW) P’esei, nunka nos no mester asumí ku un persona lo no ta habrí pa e bon nobo simplemente pa motibu di su background. Al kontrario, laga nos kompartí e mensahe di Reino ku tur hende, i hasi esei direktamente for di Beibel ki ora ku ta posibel.
4 Enfatisá e Skritura: Tin hopi oportunidat pa usa Beibel den sirbishi. Ora di presentá e revistanan, purba inkluí e teksto bíbliko ku tin den e presentashon ku ta ser sugerí. Ora di presentá e oferta di literatura pa e luna, algun publikadó ta haña ku ta mas efektivo pa den nan introdukshon lesa tambe un teksto bíbliko kuidadosamente selektá. Ora di hasi rebishita, purba pa kada biaha bo kompartí un òf mas teksto di Beibel pa asina pokopoko pero sigur yuda e doño di kas haña un konosementu eksakto. Ora di kondusí studio di Beibel, enfoká riba e tekstonan klave. Ora bo no ta den sirbishi formal, sòru pa bo tin un Beibel na man ku bo por usa si e chèns presentá pa duna testimonio informal.—2 Tim. 2:15.
5 Laga nos usa Beibel na tur oportunidat apropiá den sirbishi pa yuda otro hende benefisiá di su poder. E bèrdat di e Palabra di Dios por motivá nan kurason.—1 Tes. 2:13.
[Study Questions]
1. Ki informashon importante Beibel ta kontené?
2. Kon Beibel ta drecha bida di hende?
3. Dikon nos no mester keda sin kompartí e mensahe di Beibel ku otro hende?
4. Kon nos por usa Beibel ora di duna testimonio?
5. Dikon nos mester hasi esfuerso pa usa Beibel den nos sirbishi?