Hasiendo e Nòmber di Dios Konosí
1 Kon bo a reakshoná ora bo a haña sa di e nòmber di Dios pa promé bes? Hopi hende ta reakshoná meskos ku un señora ku a bisa: “Ora mi a mira Dios su nòmber den Beibel pa promé bes, mi a yora. E echo ku mi por a realmente konosé i usa Dios su nòmber personal a konmové mi masha hopi.” Pa e señora ei, haña sa e nòmber di Dios tabata un paso importante pa e por a siña konosé Yehova komo persona i desaroyá un relashon kuné.
2 Pakiko Hasié Konosí? Konosé e nòmber di Dios ta enserá konosé su kualidatnan, su propósitonan i su echonan. Tambe esei tin di haber ku salbashon. Apòstel Pablo a skirbi: “Ken ku invoká e nòmber di [Yehova] lo ta salbá.” Pero ‘kon nan lo invok’é’—Pablo a rasoná—a ménos ku e hendenan siña promé tokante Yehova i ehersé fe den dje? P’esei ta urgente pa kristiannan laga hende siña konosé e nòmber di Dios i tur loke e ta representá. (Rom. 10:13, 14) Sin embargo, tin un motibu asta mas grandi ainda pakiko mester hasi e nòmber di Dios konosí.
3 Den dékada di 1920, e pueblo di Dios a komprondé for di e Skritura e kuestion universal ku tin relashoná ku vindikashon di Dios su derecho komo Soberano di universo i e santifikashon di su nòmber. Promé ku Yehova destruí e malbadonan pa asina eliminá e monton di reproche riba su nòmber, mester hasi e bèrdat tokante Yehova “konosí den henter tera.” (Isa. 12:4, 5; Eze. 38:23) P’esei, nos motibu prinsipal pa prediká ta pa alabá Yehova públikamente i santifiká su nòmber dilanti henter humanidat. (Heb. 13:15) Amor pa Dios i pa próhimo lo motivá nos pa partisipá plenamente den e trabou aki ku Dios a manda nos hasi.
4 “Un Pueblo pa Su Nòmber”: Na 1931 nos a tuma e nòmber Testigunan di Yehova. (Isa. 43:10, NW) For di e tempu ei en adelante, e pueblo di Dios a hasi e nòmber divino konosí na un eskala asina grandi ku e buki Proklamadónan ta bisa na página 124: “Rònt mundu, ken ku usa e nòmber Yehova abiertamente ta ser identifiká mesora komo Testigu di Yehova.” Abo ta ser identifiká dor di esei? Gratitut pa Yehova su bondat mester motivá nos pa ‘bendishoná su nòmber,’ dor di papia tokante dje na tur okashon apropiá.—Sal. 20:7; 145:1, 2, 7.
5 Komo “un pueblo pa su nòmber,” nos tin ku tene su normanan na haltu. (Echo. 15:14; 2 Tim. 2:19) E promé kos ku hopi bes hende ta ripará di Testigunan di Yehova ta nan ekselente kondukta. (1 Ped. 2:12) Nunka nos lo kier daña su nòmber dor di pasa por haltu di prinsipionan divino òf dor di pone su adorashon na un di dos lugá den nos bida. (Lev. 22:31, 32; Mal. 1:6-8, 12-14) Mas bien, laga nos estilo di bida demostrá ku nos ta balorá e privilegio di karga Dios su nòmber.
6 Awe nos ta mira kumplimentu di loke Yehova a deklará: “For di ora solo sali te ora ku e drenta, mi nòmber lo ta grandi meimei di e nashonnan.” (Mal. 1:11) Laga nos sigui hasi e bèrdat tokante Yehova konosí i “bendishoná su nòmber santu pa semper i semper.”—Sal. 145:21.
[ Study Questions]
1. Ora un hende haña sa e nòmber di Dios, ki efekto esei por tin riba dje?
2. Dikon ta urgente pa nos siña hende tokante Yehova?
3. Kiko ta e motibu prinsipal ku nos ta prediká?
4. Den ki manera Testigunan di Yehova ta ser identifiká ku e nòmber di Dios?
5. Kiko nos kondukta tin di haber ku e echo ku nos ta karga Dios su nòmber?
6. Ki privilegio nos por disfrutá di dje awor i pa semper?