E Bendishonnan di e Sirbishi di Pionero
1 “Mi sa ku ningun otro trabou por a duná mi e satisfakshon ku mi a haña dor di kompartí e bèrdat ku otronan,” un pionero a bisa. Un otro pionera a deklará: “Na fin di kada dia, mi ta drumi dushi, i mi kurason ta yen di goso.” E pioneronan aki ta papia pa rumannan rònt mundu ku a eksperensiá e bendishonnan di e sirbishi di pionero.—Pro. 10:22.
2 Un kos ku ta duna berdadero satisfakshon ta di yuda otro hende gana konosementu di e Palabra di Dios ku ta hiba na bida. (Echo. 20:35; 1 Tes. 2:19, 20) Un pionero di hopi tempu a skirbi: “Ta emoshonante i fortalesedor di fe pa mira kon poderoso e Palabra di Dios ta den motivá hende pa hasi kambio den nan bida.” Sí, pioneronan lo disfrutá di e tipo di bendishonnan aki dor di hasi nan mes disponibel pa yuda hende i kondusí studio di Beibel.
3 Dependé Riba Yehova: Dependiendo diariamente riba e spiritu di Dios segun ku nan ta efektuá nan sirbishi, ta yuda pioneronan kultivá e “fruta di spiritu” i esei ta sirbi komo un protekshon pa nan. (Gal. 5:16, 22, 23) Ademas, komo ku pioneronan ta usa e Palabra di Dios konstantemente, hopi bes nan ta bon den usa e Skritura pa defendé e bèrdat i fortalesé otro hende. (2 Tim. 2:15) Un ruman hòmber ku a traha pionero pa vários dékada a komentá: “Trabou di pionero a yudá mi gana un konosementu profundo di Beibel, un konosementu ku mi a usa pa yuda hopi hende siña konosé Yehova i su propósitonan.” Ki un gran rekompensa!
4 Pioneronan regular tin ku dependé riba Yehova den hopi otro manera mas. Nan fe ta bira mas firme segun ku nan ta mira kon Yehova ta bendishoná e esfuerso ku nan ta hasi pa perkurá pa nan nesesidatnan material. Un ruman di 72 aña di edat ku tin 55 aña den sirbishi di pionero regular a deklará: “Yehova nunka a laga mi na kaya.” Ademas, dor di mantené nan bida simpel, pioneronan ta protehá nan mes kontra hopi ansiedat di bida. Esaki ta algu ku ta atraé bo?—Mat. 6:22; Heb. 13:5, 6.
5 Hala Serka Dios: Nos relashon ku Yehova ta un poseshon sumamente presioso. (Sal. 63:3) Ora nos ta partisipá plenamente den sirbishi pasobra nos ta stima Yehova, e relashon ei ta bira mas será. (Sant. 4:8) Un ruman ku tin mas ku 18 aña den sirbishi di pionero a bisa: “Sirbishi di pionero ta permití nos ‘purba i mira ku Yehova ta bon,’ segun ku dia tras dia nos ta desaroyá un relashon kada bes mas fuerte ku nos Kreadó.”—Sal. 34:8.
6 Ademas di tin e sirkunstansianan nesesario, pioneronan mester tin fe firme, berdadero amor pa Dios i pa próhimo, i nan mester ta dispuesto pa hasi sakrifisio. (Mat. 16:24; 17:20; 22:37-39) Sin embargo, manera nos por mira na e kara radiante di pioneronan rònt mundu, e bendishonnan di e sirbishi di pionero ta surpasá e sakrifisionan. (Mal. 3:10) E bendishonnan aki no ta limitá solamente na e pioneronan, mas bien nan famianan i e kongregashon tambe ta benefisiá masha hopi di e ekselente spiritu ku e pioneronan ta demostrá.—Fil. 4:23.
[Study Questions]
1, 2. Ki bendishonnan ta estrechamente ligá ku e sirbishi di pionero, i dikon?
3, 4. Den ki manera e sirbishi di pionero ta siña un persona dependé riba Yehova, i kon esaki por yud’é krese spiritualmente?
5. Kon e sirbishi di pionero ta yuda un persona hala serka Yehova?
6. Kiko pioneronan mester tin, i ken mas fuera di e pioneronan ta benefisiá?