Bisti Boso Mes ku Humildat
1 Un hóben wardadó di karné ta konfia den Yehova i ta derotá un guerero poderoso. (1 Sam. 17:45-47) Un hòmber riku ta soportá kalamidat ku su santu pasenshi. (Jòb 1:20-22; 2:9, 10) E Yu di Dios ta duna su Tata tur onor pa loke e ta siña hende. (Juan 7:15-18; 8:28) Den kada un di e ehèmpelnan aki, humildat a hunga un papel klave. Awe tambe humildat ta importante pa trata ku e vários situashonnan ku nos ta konfrontá.—Kol. 3:12.
2 Ora Nos Ta Prediká: Komo minister kristian, humildemente nos ta kompartí e bon nobo ku tur klase di hende, sin husga nan a base di nan rasa, kultura òf antesedente. (1 Kor. 9:22, 23) Si algun hende kontestá nos brutu òf ta rechasá e mensahe di Reino na un manera arogante, nos no ta hasi meskos ku nan, sino mas bien ku pasenshi nos ta sigui buska esnan ku ta digno di e mensahe. (Mat. 10:11, 14) En bes di purba impreshoná hende ku nos konosementu òf edukashon, nos ta dirigí atenshon na e Palabra di Dios, rekonosiendo ku e ta mas konvinsente òf persuasivo ku kualkier kos ku nos lo por bisa. (1 Kor. 2:1-5; Heb. 4:12) Imitando Hesus, nos ta duna tur alabansa na Yehova.—Mar. 10:17, 18.
3 Den Kongregashon: Tambe kristiannan mester ‘bisti nan mes ku humildat pa ku otro.’ (1 Ped. 5:5) Si nos ta konsiderá otro hende komo mas importante ku nos mes, nos lo buska maneranan pa sirbi nos rumannan en bes di spera pa nan sirbi nos. (Juan 13:12-17; Fil. 2:3, 4) Nos lo no sinti ku nos ta muchu importante pa hasi sierto tareanan, manera por ehèmpel limpia Salòn di Reino.
4 Humildat ta yuda nos ‘soportá un i otro den amor’ i asina promové pas i unidat den e kongregashon. (Efe. 4:1-3) E ta yuda nos pa ta sumiso na esnan nombrá pa hiba delantera. (Heb. 13:17) E ta motivá nos pa aseptá kualkier konseho òf disiplina ku wòrdu duná na nos. (Sal. 141:5) I humildat ta pone nos dependé riba Yehova ora nos ta atendé kualkier privilegio ku kisas nos a risibí den kongregashon. (1 Ped. 4:11) Meskos ku David, nos ta rekonosé ku nos éksito no ta dependé di abilidat humano sino di Dios su bendishon.—1 Sam. 17:37.
5 Dilanti Nos Dios: Mas ku tur kos, nos mester ‘humiá nos mes bou di e man poderoso di Dios.’ (1 Ped. 5:6) Si nos ta luchando ku sirkunstansianan difísil, kisas nos ta anhelá e alivio ku e Reino lo trese. Pero humildemente nos ta tene pasenshi i ta warda pa Yehova kumpli ku su promesanan na su debido tempu. (Sant. 5:7-11) Meskos ku Jòb, kende a warda su integridat, nos preokupashon prinsipal ta pa ‘e nòmber di Yehova sigui ser bendishoná.’—Jòb 1:21.
6 Profeta Daniel ‘a humiá su mes dilanti di su Dios’ i a risibí Yehova su aprobashon i tambe hopi privilegio bunita. (Dan. 10:11, 12) Laga nos tambe bisti nos mes ku humildat, sabiendo ku “e rekompensa di humildat i e temor di SEÑOR ta rikesa, onor i bida.”—Pro. 22:4.