E Balor Superior di Sabiduria Divino
1 Algun hende ta haña ku Testigunan di Yehova mester konsentrá nan esfuerso mas direktamente riba yuda aliviá e problemanan ku humanidat ta konfrontá awendia. E personanan ei no ta mira e balor superior di nos trabou edukativo basá riba Beibel. Ta manera apòstel Pablo a skirbi: “E mensahe di e [“staka di tormento,” NW ] ta lokura pa esnan ku ta peresé, ma pa nos ku ta wòrdu salbá e ta e poder di Dios.” (1 Kor. 1:18) Sí, nos sa ku e sirbishi kristian ta e trabou di mas importante ku ta tuma lugá riba tera awe.
2 Un Mihó Bida for di Awor: Esfuersonan ku hende a hasi pa solushoná problemanan di humanidat tabatin masha poko resultado. Leinan ku ta prohibí aktonan kriminal, no a stroba krímen di oumentá. Tratadonan di pas i ehérsitonan di pas no a trese un fin na guera. Programanan sosial no a logra kaba ku pobresa. (Sal. 146:3, 4; Jer. 8:9) Na kontraste, e mensahe di Reino a transformá bida di miónes di hende dor di yuda nan bisti e personalidat nobo ku Dios ta aseptá. (Rom. 12:2; Kol. 3:9, 10) Dor di hasi esei nan ta disfrutá di un mihó kalidat di bida for di awor.—1 Tim. 4:8.
3 Un Futuro Briante: Ademas di yuda nos trata eksitosamente ku problemanan aktual di bida, sabiduria divino ta kapasitá nos pa plania efikasmente pa futuro. (Sal. 119:105) E ta evitá ku nos ta hasi esfuersonan bano pa drecha e sistema aktual di kosnan. (Ekl. 1:15; Rom. 8:20) Nos ta masha gradisidu ku nos no ta malgastando nos bida dor di sigui tras di metanan ku ta simplemente un ilushon! Mas bien, nos ta enfoká nos esfuersonan riba Yehova su promesa sigur di “shelunan nobo i un tera nobo,” den kua hustisia lo biba. Ora Yehova su dia di huisio yega, sin duda lo ta bisto ku esnan ku a dependé riba sabiduria divino a tuma e desishon korekto.—2 Ped. 3:10-13; Sal. 37:34.
4 Ounke sabiduria divino lo por parse impráktiko pa hende ku ta profundamente enbolbí den ‘e sabiduria di e siglo’ aki, en realidat e ta e úniko proseder práktiko pa sigui. (1 Kor. 1:21; 2:6-8) P’esei, nos ta keda proklamá rònt mundu e mensahe ku ta bini di Yehova, kende ta “e úniko Dios sabí.”—Rom. 16:27.