Un Trabou Ku Tin Apoyo di Dios
1 Entre tur e sirbidónan di Dios djawendia, ta algun di nan tin edukashon eksepshonal, rikesa òf prominensia den e sistema aktual di kosnan. Esei ta pone ku sierto hendenan ta pensa ku nos sirbishi ta insignifikante i nan ta rechas’é. (Isa. 53:3) Sin embargo, e trabou edukashonal basá riba Beibel ku nos ta efektuá a duna konsuelo i speransa na miónes di hende rònt mundu. Kon hende komun i koriente por a logra e resultadonan sobresaliente ei? Nan por a hasi esei solamente ku e apoyo di Dios. (Mat. 28:19, 20; Echo. 1:8) Apòstel Pablo a splika: “Dios a skohe e kosnan débil di mundu pa brongosá e kosnan ku ta fuerte.”—1 Kor. 1:26-29.
2 Mayoria di e apòstel- i kristiannan di promé siglo “no tabata hòmber eduká ni siñá.” (Echo. 4:13) Tòg, ku kurashi nan a kumpli ku nan tarea di prediká e bon nobo, i Yehova a bendishoná nan esfuerso. Apesar di opstákulo i oposishon, ‘e palabra di Yehova tabata krese poderosamente i tabata prevalesé.’ Nada no por a stòp e trabou pasobra e tabatin e apoyo di Dios. (Echo. 5:38, 39; 19:20) Den nos tempu moderno e situashon ta meskos. Ni sikiera oposishon desididu di parti di gobernantenan poderoso no por a stroba e bon nobo di prevalesé i krese.—Isa. 54:17.
3 Dios Ta Haña Tur Mérito: Nos tin e privilegio di ta ministernan di Dios. Esaki ta un motibu pa broma? Klaru ku nò! Refiriendo na e sirbishi kristian, Pablo a skirbi: “Nos tin e tesoro aki den pòchi di klei, pa e ekselensia di e poder por ta di Dios i no di nos mes.” (2 Kor. 4:7) Pablo a rekonosé ku ta ku e fortalesa di Dios so e por a kumpli ku su sirbishi.—Efe. 6:19, 20; Fil. 4:13, NW.
4 Nos tambe ta rekonosé ku ta solamente pasobra nos tin e “yudansa di Dios” nos por efektuá e trabou di prediká. (Echo. 26:22) Mediante e proklamashon mundial ei, Yehova ta usa nos den un manera poderoso pa sagudí e nashonnan, lokual ta un señal dje ehekushon di huisio aplastante ku lo bini pronto. (Hag. 2:7) Ki un gran privilegio nos tin di por ta ‘kolaboradónan di Dios’ den e gran kosecha spiritual!—1 Kor. 3:6-9.