“Stima Yehova, Boso Tur Ku Ta Leal”
Lo Konmemorá e Morto di Hesus Dia 4 di Aprel
1 Añanan pasá ora ku Ukrania tabata bou di gobernashon komunista, outoridatnan tabata vigilá e rumannan hopi djaserka—foral ora e dia di Sena di Señor tabata aserkando—pasobra nan kier a haña sa unda nan ta reuní. Esaki semper tabata un problema pasobra e outoridatnan tabata sa mas o ménos ki fecha e konmemorashon ta kai. Kiko e rumannan por a hasi? E bodega di kas di un ruman muhé tabata en parte bou di awa. Ya ku outoridatnan no tabata ferwagt ku hende lo a reuní eiden, e rumannan a traha un plataforma di palu riba e awa, ku tabata yega te na nan rudia. Ounke ku nan mester a sinta ku nan pia doblá riba e plataforma i ku nan kabes no masha leu for dje plafòn, niun hende no a stroba e kongregashon di disfrutá di su Memorial.
2 E determinashon di nos rumannan di Ukrania pa obedesé e mandamentu pa konmemorá e morto di Hesus ta un manera maravioso ku nan a demostrá nan amor pa Dios. (Luk. 22:19; 1 Juan 5:3) Ki ora ku nos tin ku enfrentá opstákulo den nos bida, laga e ehèmpelnan ei sirbi komo animashon pa nos i duna nos e determinashon pa ta presente pa selebrá e Sena di Señor dia 4 di aprel. Asina nos ta demostrá ku nos tin e mesun sintimentu ku e salmista, kende a kanta: “Stima Yehova, boso tur ku ta leal na dje.”—Sal. 31:23, NW.
3 Yuda Otro Hende Haña Mas Amor pa Dios: Amor pa Dios ta motivá nos tambe pa invitá otro hende bin selebrá e konmemorashon huntu ku nos. E suplemento di Nos Ministerio di Reino di febrüari a animá nos kada un pa traha un lista di e personanan ku nos tin intenshon di invitá pa Memorial. Bo ta hasiendo esfuerso diligente pa invitá kada persona riba bo lista? Tuma tempu pa splika nan e nifikashon di e okashon. Podisé si despues bo rekordá nan na un manera bondadoso di e dia i ora ku e Memorial ta tuma lugá i, si ta nesesario, ofresé pa bai huntu ku nan, esaki lo animá nan pa asistí.
4 Na e konmemorashon, hasi un esfuerso spesial pa kumindá esnan ku a aseptá bo invitashon i laga nan sinti nan na kas. Kon bo por yuda nan haña mas amor pa Yehova? Sea kla i dispuesto pa kontestá nan preguntanan. Sea alerta pa ofresé nan un studio di Beibel si e situashon ta permití. Invitá nan pa asistí na nos reunionnan semanal di kongregashon. Ansianonan spesialmente lo mustra interes den kristiannan inaktivo ku ta presente. Nan por hasi areglo pa bishitá e personanan aki i rasonando riba puntonan for di e diskurso di Memorial nan por animá nan pa bolbe bira aktivo.—Rom. 5:6-8.
5 Kon pa Profundisá Nos Propio Amor pa Yehova: Meditashon riba e don di reskate por profundisá nos amor pa Yehova i pa su Yu. (2 Kor. 5:14, 15) Un Testigu ku tin hopi aña ta bai Memorial a bisa: “Ku anhelo nos ta spera e Memorial. Kada aña e ta bira mas spesial. Mi ta kòrda kon 20 aña pasá, pará den e kas fúnebre ta wak mi [defuntu] tata stimá, mi a haña berdadero apresio di kurason pa e reskate. Promé ku esei, e asuntu di reskate tabata gewon algu ku mi tabata sa di dje. Ta klaru ku mi tabata sa e tekstonan i asta kon pa splika nan! Pero ta ora ku mi a sinti e realidat friu di morto, t’e ora ei numa mi kurason a realmente yena ku goso pa loke e presioso reskate ei lo logra pa nos.”—Juan 5:28, 29.
6 Segun ku e fecha di e konmemorashon pa e aña aki ta aserká, tuma tempu pa prepará bo kurason pa e okashon. (2 Kró. 19:3, NW) Meditá riba e lesamentu di Beibel spesial pa temporada di Memorial, ku nos ta haña den e foyeto Eksaminando e Skritura Diariamente—2004 i riba e Kalènder 2004. Algun ruman ta gusta repasá e kapítulonan 112-16 den e buki Homber mas importante, durante nan studio di famia. Otronan ta hasi investigashon adishonal usando otro publikashon pa studia Beibel ku e esklabo fiel i prudente a perkurá. (Mat. 24:45-47) Nos tur por menshoná e don di reskate den nos orashonnan sinsero. (Sal. 50:14, 23) Sí, durante e temporada aki di Memorial, laga nos reflehá kontinuamente riba Yehova su amor pa nos, i buska maneranan pa demostrá nos amor p’e.—Mar. 12:30; 1 Juan 4:10.