Mustra Bo Gratitut
1 Ounke nos ta biba den “tempunan trabahoso,” nos tin hopi motibu pa ta gradisidu na Yehova. (2 Tim. 3:1) E regalo di mas presioso ku el a duna na nos fabor ta su Yu. (Juan 3:16) Ademas, nos tin un abundansia di kuminda spiritual, miéntras hendenan den religion falsu ta muriendo di hamber spiritual. (Isa. 65:13) Nos ta parti di un hermandat mundial i nos tin e privilegio di partisipá den e ekspanshon emoshonante di adorashon berdadero. (Isa. 2:3, 4; 60:4-10, 22) Kon nos por mustra nos gratitut na Yehova pa tur e bendishonnan ku e ta drama riba nos?—Kol. 3:15, 17.
2 Sirbishi Gososo di Henter Kurason: Ora apòstel Pablo tabata trata e tema di dunamentu, el a skirbi: “Dios ta stima esun ku ta duna ku alegria.” (2 Kor. 9:7) E prinsipio aki ta konta tambe pa nos sirbishi na Dios. Nos ta reflehá gratitut den nos entusiasmo pa e bèrdat, nos goso na reunionnan kristian, nos selo den sirbishi di vèlt i nos goso den kumpli ku Dios su boluntat.—Sal. 107:21, 22; 119:14; 122:1; Rom. 12:8, 11.
3 Den Israel di antigwedat, tabatin sierto ofrendanan pa kua e Lei no a stipulá un kantidat spesífiko. Kada adoradó por a mustra su gratitut dor di duna “konforme e bendishon di SEÑOR” ku el a risibí. (Deu. 16:16, 17) Di e mesun manera awe, un kurason gradisidu lo impulsá nos pa duna te n’e grado ku nos sirkunstansia ta permití den e trabou di prediká e Reino i hasi disipel. Hopi bes e lunanan di fakansi ta duna nos oportunidatnan èkstra pa mustra nos gratitut. Tin ruman ta probechá di nan dianan liber di trabou òf skol i dje dianan ku ta bira skur mas lat pa nan oumentá nan oranan den sirbishi di vèlt i pa asta traha pionero ousiliar. Bo por oumentá bo sirbishi den e temporada di fakansi aki?
4 Abundá den Gradisimentu: Orashon ta un manera masha importante pa nos ekspresá nos gratitut na Yehova. (1 Tes. 5:17, 18) E Palabra di Dios ta urgi nos pa “abundá” ku fe “den gradisimentu.” (Kol. 2:7) Asta ora nos ta hopi okupá òf bou di strès, semper nos mester inkluí gradisimentu den nos orashonnan diario. (Fil. 4:6) Sí, nos por ‘abundá ku hopi gradisimentu na Dios’ mediante nos sirbishi i tambe nos orashonnan.—2 Kor. 9:12.