Músika Refreskante
1 Kantamentu i músika ta un parti importante di adorashon berdadero. Den Israel di antigwedat, Asaf i su rumannan a kanta: “O duna gradisimentu na SEÑOR. . . . Kanta na dje, kanta alabansa na dje; papia di tur su maravianan.” (1 Kró. 16:8, 9) Awendia nos ta halsa nos bosnan den kantika na Yehova tur siman durante nos reunionnan di kongregashon. (Efe. 5:19) Esta un maravioso oportunidat pa duna alabansa na su nòmber!—Sal. 69:30.
2 Ora nos ta skucha Melodianan di Reino, esta, grabashonnan di kantikanan di Reino toká pa un orkesta, esaki por yena nos mente ku pensamentunan spiritual. “Segun ku e melodianan ta toka, mi ta kòrda e letranan,” un ruman muhé a splika. “Esaki ta un manera ekselente pa mi tene Yehova na mente, tanten ku mi ta disfrutá di músika!”—Fil. 4:8.
3 Okashonnan pa Disfrutá di Nan: Ora bo toka Melodianan di Reino na kas, esaki ta krea un ambiente amoroso i spiritual ku ta kontribuí na pas den famia. Un famia a skirbi: “Nos ta toka [e músika aki] bes tras bes na kas i den outo, sin ku nunka nos ta kansa di e areglonan musikal stimulante aki. Hopi bes e Melodianan di Reino a duna nos e trankilidat mental apropiá ora nos ta prepará pa bai reunion kristian òf ora nos ta kore den outo pa bai asamblea.” Un ruman muhé a bisa: “Ta dushi pa skucha nan ora mi ta hasi trabou di kas. Ken por a imaginá ku lo mi ta kontentu ora mi ta dobla paña? Mi tin intenshon di toka e melodianan aki ora mi ta sinti mi desanimá. E músika ta asina stimulante! . . . Kada un kantika ta lanta e sintimentu di felisidat.” Tin okashonnan ku músika refreskante asina lo por benefisiá bo?
4 Hopi músika djawendia ta reflehá e manera di pensa di mundu. Mayornan por yuda nan yunan siña apresiá músika sano dor di hasi bon uso di e grabashonnan di Melodianan di Reino. Hopi studiante di Beibel i personanan interesá tambe lo keda kontentu pa haña sa di e bunita kantikanan aki ku ta glorifiká Yehova i ta duna hende ánimo.—Sal. 47:1, 2, 6, 7.