Yehova Ta Yuda Esnan Ku Ta Konfia den Dje
1 Hopi hende ta mira plaka, poder i abilidat humano komo e klavenan pa éksito. (Sal. 12:4; 33:16, 17; 49:6) Sin embargo, esnan ku ta teme Yehova i ta konfia den dje, tin e siguransa bíbliko ku “e ta nan yudansa i nan eskudo.” (Sal. 115:11) Laga nos konsiderá dos área den kua nos mester demostrá konfiansa den Yehova.
2 Komo Sirbidónan Kristian: Ki ora ku nos ta kumpliendo ku un asignashon den e kongregashon òf ku nos ta siña hende den sirbishi di vèlt, nos mester dependé riba nos Dios. Pensa riba e ehèmpel di Hesus. Ounke e tabata Yu di Dios, e no a konfia den su propio sabiduria ni abilidat, mas bien el a dependé kompletamente riba su Tata selestial. (Juan 12:49; 14:10) Siguramente nos mester dependé muchu mas riba nos Tata selestial! (Pro. 3:5-7) Ta ku Yehova su bendishon so, nos esfuersonan limitá lo onr’é i benefisiá otro hende.—Sal. 127:1, 2.
3 Nos ta demostrá ku nos ta dependé riba Yehova dor di resa pidié su guia i e yudansa di su spiritu santu. (Sal. 105:4; Luk. 11:13) Ademas, nos ta demostrá nos konfiansa den Dios dor di basa nos siñansa riba Su Palabra, Beibel. Su mensahe tin e poder pa influensiá kurason di hende i transformá nan bida . (Heb. 4:12) Ora nos ‘sirbi pa medio di e forsa ku Dios ta duna,’ esaki ta trese gloria pa Yehova.—1 Ped. 4:11.
4 Ora di Trata ku Problema: Ora nos haña nos ku preshon i problema tambe nos mester akudí na Yehova pa yudansa. (Sal. 46:1) Por ehèmpel, un doño di trabou kisas ta vasilá pa duna nos liber pa bai asamblea, òf nos por haña nos ku un situashon difísil den nos bida di famia. Nos ta mustra nos konfiansa den Yehova dor di resa na dje sinseramente i sigui e guia ku e ta perkurá mediante su Palabra i su organisashon. (Sal. 62:8; 119:143, 173) Dor di tuma e pasonan aki, Yehova su sirbidónan ta ripará ku e ta yuda nan.—Sal. 37:5; 118:13, 16.
5 Yehova mes ta duna nos e garantia aki: “Bendishoná ta e hende ku ta konfia den SEÑOR, i kende su konfiansa ta den SEÑOR.” (Jer. 17:7) Laga nos demostrá nos konfiansa den dje, den tur loke nos ta hasi!—Sal. 146:5.