Imitá Yehova Su Hustisia
1 “SEÑOR ta stima hustisia.” (Sal. 37:28) P’esei, ounke Yehova a dekretá ku e mundu inhustu aki lo ser destruí, el a hasi areglo pa duna un spièrtamentu promé. (Mar. 13:10) Esaki ta duna hende e oportunidat di repentí i ser salbá. (2 Ped. 3:9) Nos ta hasiendo esfuerso pa imitá Yehova su hustisia? E miseria i sufrimentu di humanidat ta motivá nos pa kompartí e speransa di Reino ku otro hende? (Pro. 3:27) Amor pa hustisia lo motivá nos pa partisipá aktivamente den e predikashon.
2 Prediká sin Hasi Distinshon di Persona: Nos ta “hasi hustisia” dor di proklamá Dios su propósito na tur hende, sin hasi distinshon di persona. (Mik. 6:8) Nos mester resistí e inklinashon ku hende imperfekto tin di husga otronan a base di nan aparensia. (Sant. 2:1-4, 9) Yehova “ta deseá pa tur hende wòrdu salbá i yega na konosementu di e bèrdat.” (1 Tim. 2:4) E bèrdat di e palabra di Dios por pone hende hasi kambionan remarkabel den nan bida. (Heb. 4:12) Realisando esaki por motivá nos pa aserká hende ku konfiansa, asta hende ku podisé den pasado a nenga di skucha.
3 Un ruman muhé ku tabata traha den un negoshi tabata un poko spantá pa e aparensia di un kliente ku tabatin kustumber di bin einan. No opstante, ora un bon chèns a presentá, el a purba duna e kliente testimonio tokante e Paradeis ku Dios a primintí. E hòmber a respondé bòt ku e no ta kere den sprookje i ku ta un hippie i drogadikto e ta. Pero e ruman no a entregá. Un dia e hòmber a puntr’é kiko e ta pensa di e hòmber su kabei largu. Anto ku takto e ruman a splik’é kiko Beibel ta bisa di e asuntu. (1 Kor. 11:14) Pa e ruman su grato sorpresa, e siguiente dia e hòmber tabata bon feitá i ku kabei kòrtiku! El a pidi un studio di Beibel, anto gustosamente un ruman hòmber a kondusí esei kuné, i el a progresá te na dedikashon i boutismo. Meskos ku e hòmber aki, hopi hende ku ta sirbi Yehova awe ta gradisidu pa e esfuersonan imparsial i persistente di e rumannan ku a trese e mensahe di Reino pa nan.
4 Pronto Yehova lo eliminá inhustisia totalmente for di tera. (2 Ped. 3:10, 13) Den e tempu limitá ku a resta, laga nos imitá Yehova su hustisia dor di duna tur hende un oportunidat pa skapa di e binidero destrukshon di Satanas su mundu inhustu.—1 Juan 2:17.