Perseveransia Ta Ser Rekompensá
1 “Dor di boso perseveransia boso lo gana boso alma.” (Luk. 21:19) E palabranan ei ta parti di e profesia ku Hesus a duna relashoná ku “e fin di tempu” òf fin dje sistema di kosnan aki. Nan ta mustra bon kla ku pa nos por keda fiel, nos tin ku prepará nos mes pa enfrentá hopi prueba. Pero ku e forsa di Dios, nos kada un por “perseverá te na fin,” i ‘ser salbá.’—Mat. 24:3, 13; Fil. 4:13, NW.
2 Persekushon, problema ku salú, difikultat finansiero i doló emoshonal por pone ku kada dia ta bira un prueba pa nos. Sin embargo, nunka nos mester lubidá ku ta Satanas ta purbando di kibra nos integridat òf fieldat na Yehova. P’esei, kada dia ku nos keda leal na nos Tata ta un dia mas ku nos a yuda duna un kontesta na Esun ku a kuestioná nos integridat. Ta ki un satisfakshon pa sa ku Yehova no ta lubidá e “lágrimanan” ku nos ta drama durante prueba. Nan ta presioso p’e, i nos fieldat ta hasi su kurason kontentu!—Sal. 56:8; Pro. 27:11.
3 Refiná dor di Prueba: Sufrimentu por saka na kla un falta di fe òf un debilidat personal, manera orguyo òf falta di pasenshi. En bes di purba evitá prueba òf pone fin na dje na un manera ku no ta bíbliko, nos tin ku hasi kaso di e konseho di e Palabra di Dios ku ta bisa: “Laga perseveransia tin su resultado perfekto.” Dikon? Pasobra ora nos ta perseverá fielmente atraves di prueba, esaki ta yuda nos bira “perfekto i kompletu, sin falta di nada.” (Sant. 1:2-4) Perseveransia por yuda nos kultivá kualidatnan balioso manera, empatia, miserikòrdia i tambe abilidat pa ta rasonabel.—Rom. 12:15.
4 Kalidat Probá di Fe: Ora nos ta wanta bou di prueba, nos ta atkerí un kalidat probá di fe ku tin hopi balor den bista di Dios. (1 Ped. 1:6, 7) E fe ei ta ekipá nos pa para firme atraves di futuro pruebanan. Ademas, nos por sinti ku nos tin e aprobashon di Dios, i esaki ta fortalesé nos speransa, hasiend’e mas real pa nos.—Rom. 5:3-5.
5 Santiago 1:12 ta resaltá e rekompensa di mas grandi pa nos perseveransia. E ta bisa: “Bendishoná ta un hende ku ta perseverá den prueba; pasobra unabes ku el a pasa e prueba, e lo risibí e korona di bida.” P’esei, laga nos keda firme den nos deboshon na Yehova, ku e konfiansa ku lo e rekompensá “esnan ku ta stim’é,” rikamente.