Demostrá e Spiritu di Pionero
1 Tur publikadó di Reino por manifestá e spiritu di pionero, sea ku nan por traha komo pionero awor òf nò. Nan realmente ke obedesé e mandamentu di prediká i hasi disipel. (Mat. 28:19, 20; Echo. 18:5) Nan ta interesá den hende i ta hasi sakrifisio pa por kumpli ku nan ministerio. (Mat. 9:36; Echo. 20:24) Yehova su sirbidónan ta dispuesto pa hasi loke sea ta nesesario pa yuda otro hende siña e bèrdat. (1 Kor. 9:19-23) Laga nos konsiderá e ehèmpel di un sirbidó di Yehova ku a demostrá e klase di spiritu ei, Felipe e evangelisadó.
2 Prediká i Siña Hende: Felipe a kumpli ku responsabilidatnan pisá den e kongregashon di promé siglo. (Echo. 6:1-6) Pero e tabata prinsipalmente un predikadó seloso di e bon nobo. (Echo. 8:40) Pues awe, miéntras ku ansiano- i sirbidónan ministerial ta kumpli ku nan obligashonnan asigná, nan por demostrá e spiritu di pionero dor di hiba delantera den e ministerio ku entusiasmo. Esaki lo ta un gran estímulo pa e spiritu di e kongregashon!—Rom. 12:11.
3 Despues di morto di Esteban, un ola di persekushon a kousa gran trastorno den bida di e disipelnan. Sin embargo, Felipe a sigui prediká, i el a hunga un papel importante den inisiá e trabou di prediká entre e samaritanonan. (Echo. 8:1, 4-6, 12, 14-17) Nos por imitá su ehèmpel dor di sigui hasi e bon nobo konosí ora nos ta pasa den prueba, i dor di prediká na tur hende ku nos topa sin hasi distinshon di persona.—Juan 4:9.
4 Nos por mira Felipe su abilidat komo maestro di e Palabra di Dios den e relato tokante e eunuko di Etiopia ku a kombertí. (Echo. 8:26-38) P’esei un otro manera ku nos por manifestá e spiritu di pionero ta dor di desaroyá e abilidat di usa Beibel i di ‘rasoná for di e Skritura.’ (Echo. 17:2, 3) Meskos ku Felipe, nos ta trata na prediká e bon nobo tur kaminda ku nos por haña hende i na tur momentu apropiá.
5 Famia i Kongregashon: Sin duda, Felipe su aktitut i ehèmpel tabatin un efekto positivo riba su yu muhénan. (Echo. 21:9) Di igual manera, mayornan kristian ku ta laga nan bida drei rònt dje interesnan di Reino ta enkurashá nan yunan pa hasi meskos. Un mayor ku ta prediká selosamente na otro hende—apesar di ta kansá despues di un siman drùk—por laga un impreshon duradero riba kurason di su yu.—Pro. 22:6.
6 Felipe a mustra hospitalidat na Pablo i Lukas, kendenan tabata kristiannan seloso ku tabata traha duru den e sirbishi di Yehova. (Echo. 21:8, 10) Kon nos awe por mustra nos apresio i apoyo pa esnan seloso? Kisas nos por ofresé pa traha ku e pioneronan un mainta òf un atardi riba un dia ku no tin hopi ruman ta sali den sirbishi. (Fil. 2:4) Tambe nos por invitá nan na nos kas pa asosiashon edifikante. Sea kual sea nos sirkunstansia, laga nos tur lucha pa demostrá e spiritu di pionero.
[Study Questions]
1. Kon lo bo deskribí e spiritu di pionero?
2. Kon ansiano- i sirbidónan ministerial por imitá e selo ku Felipe tabatin pa e ministerio?
3. Kon nos por desplegá e spiritu di pionero ora nos ta pasa den prueba?
4. Ki ehèmpel Felipe a pone komo maestro?
5. Kiko por yuda mayornan kristian inkulká e spiritu di pionero den nan yunan?
6. Kon nos por mustra apresio pa e pioneronan den nos kongregashon?