Nos Tin Mester di Bo Yudansa
1 “Danki pa tur loke boso ta hasi pa nos tur. Boso ta yuda nos bon.” E komentario ei ta reflehá bon e gratitut ku nos ta sinti pa nos ansianonan i sirbidónan ministerial. Mas Dios su organisashon sigui krese, mas ruman hòmber maduro lo tin mester pa sirbi den e kasi 100.000 kongregashonnan rònt mundu. Si bo ta un ruman hòmber batisá, nos tin mester di bo yudansa.
2 “Trata pa Alkansá”: Kon bo por trata pa alkansá privilegionan adishonal di sirbishi? (1 Tim. 3:1, NW) Básikamente, dor di pone un bon ehèmpel den tur aspekto di bo bida. (1 Tim. 4:12; Tito 2:6-8; 1 Ped. 5:3) Partisipá plenamente den e predikashon, i yuda otronan pa hasi e mesun kos. (2 Tim. 4:5) Mustra un interes sinsero den e bienestar di bo rumannan den fe. (Rom. 12:13) Perkurá pa bo ta un bon studiante di e Palabra di Dios, i desaroyá e “arte di siña.” (Tito 1:9, NW; 1 Tim. 4:13) Kumpli diligentemente ku e asignashonnan ku e ansianonan ta konfia na bo. (1 Tim. 3:10) Si bo ta un kabes di famia, ‘manehá bo mes kas bon.’—1 Tim. 3:4, 5, 12.
3 Sirbi komo ansiano òf sirbidó ministerial ta nifiká trabou duru i ta rekerí un spiritu di sakrifisio propio. (1 Tim. 5:17) P’esei, ora bo ta trata na alkansá e privilegionan ei, konsentrá riba sirbi otro hende humildemente. (Mat. 20:25-28; Juan 13:3-5, 12-17) Meditá riba e spiritu òf aktitut di Timoteo, i purba imit’é. (Fil. 2:20-22) Meskos kuné, laga bo bon kondukta rekomendá bo. (Echo. 16:1, 2) Segun ku bo ta kultivá e kualidatnan nesesario pa atendé privilegionan adishonal i ta apliká konsehonan ku bo haña pa mehorá, “bo progreso [lo] ta bisto pa tur hende.”—1 Tim. 4:15.
4 Mayornan, Siña Boso Yunan pa Yuda: Muchanan por kuminsá siña yuda for di chikitu. Siña nan paga tinu durante reunion, prediká i komportá nan mes bon na Salòn di Reino i na skol. Enbolbé nan den sirbi otro hende, manera entre otro dor di duna un man ku limpiesa di Salòn di Reino i yuda hende di edat. Laga nan eksperensiá e felisidat ku un hende ta sinti ora e duna. (Echo. 20:35, NW) E edukashon ei por yuda nan bira e pioneronan, sirbidónan ministerial i ansianonan di mañan.