Kon Nos Por Prediká na Nos Famianan?
1 Ki goso mas grandi nos lo por tin ku drenta e mundu nobo ku nos sernan kerí, siendo uní ku nan den adorashon di Yehova! Dor di duna testimonio na nos famianan, e perspektiva gososo aki lo por bira realidat. Sin embargo, pa nos hasi esei den un manera refreskante nos mester di disernimentu. Un superintendente di sirkuito a remarká: “E mihó resultadonan ta ser lográ dor di rumannan ku ta lanta kuriosidat di nan famianan dor di duna nan testimonio tiki-tiki i regular.” Kon nos por hasi esei?
2 Lanta Nan Kuriosidat: Meditá di antemano riba kon lo bo por lanta interes di bo famianan. (Pro. 15:28) Kiko ta nan interesnan? Ki problemanan nan ta enfrentá? Kisas lo bo por mustra nan un artíkulo òf menshoná un teksto interesante riba un tema ku ègt ta interesá nan. Si bo famianan ta biba leu, por ta lo bo por hasi esei via karta òf telefon. Planta simianan di e bèrdat sin bombardiá nan ku informashon, i laga kresementu di e simianan ei den man di Yehova.—1 Kor. 3:6.
3 Hesus a bisa un hòmber for di ken el a saka hopi demoño: “Bai bo kas serka bo hendenan i konta nan ki kosnan grandi Señor a hasi pa bo, i kon el a tene miserikòrdia di bo.” (Mar. 5:19) Imaginá ki impakto esaki lo tabatin riba su famianan! Maske lo bo no eksperensiá algu asina dramátiko, probablemente bo famianan ta interesá den bo aktividatnan òf esnan di bo yunan. Lo bo por habri kaminda pa bo konta nan algu mas tokante Yehova i su organisashon dor di papia riba un parti ku bo tabatin den e Skol di Ministerio Teokrátiko, un kongreso ku bo a bai, un bishita ku bo a hasi na Bètel òf un suseso personal importante.
4 Usa Disernimentu: Ora bo ta duna testimonio na bo famianan, no konta nan tur kos di biaha. Kòrdando bèk riba e tempu ku el a kuminsá studia Beibel, un ruman hòmber a atmití: “Mi a bombardiá mi mama pa oranan largu ku splikashon riba kasi tur kos ku mi a siña for di Beibel, i esaki hopi bes a hiba na diskushonnan pisá, spesialmente ku mi tata.” Asta den kaso ku un famia di bo mustra interes den e mensahe di Beibel, kontest’é di tal manera ku lo e keda ku gana di sa mas. (Pro. 25:7) Semper mustra rèspèt, bondat i pasenshi, meskos ku lo bo a hasi ora di papia ku un hende ku bo no konosé den sirbishi di vèlt.—Kol. 4:6.
5 Na dado momentu, Hesus su famianan a pensa ku su kabes no ta bon. (Mar. 3:21) Sin embargo, mas despues algun di nan a bira kreyente. (Echo. 1:14) Si e promé intento ku bo hasi pa papia ku bo famianan no kai den bon tera, no entregá. Sirkunstansia i aktitut por kambia. Sigui buska un otro oportunidat pa papia tokante un punto ku lo por lanta nan kuriosidat. Lo bo por tin e goso di yuda nan kuminsá kana riba e kaminda pa bida eterno.—Mat. 7:13, 14.
[Study Questions]
1. Dikon nos mester di disernimentu ora nos ta prediká na nos famianan?
2. Kon interes sinsero den nos famianan por yuda nos lanta nan kuriosidat?
3. Kon e interes ku nos famianan tin den nos lo por habri kaminda pa nos duna testimonio?
4. Ki trampanan nos mester evitá ora nos ta duna testimonio na nos famianan?
5. Kiko nos mester hasi si nos famianan no reakshoná positivo ora nos prediká na nan?