Programa di Famia: Reunionnan di Kongregashon
1 Si bo ta un mayor kristian, lo bo ke pa bo yunan lanta ku un amor pa Yehova i sirbié, anto finalmente haña bida eterno den e mundu nobo ku Dios a primintí. Kon lo bo por yuda nan pone e adorashon di Yehova na promé lugá den nan bida? Un manera prinsipal ta mediante bo ehèmpel. (Pro. 20:7) Kòrdando riba e ehèmpel di su mama kreyente, un ruman muhé a bisa: “Nunka no tabatin ningun duda si nos lo a bai reunion òf nò.” Esei a hasi un impakto permanente riba dje.
2 Bo famia ta komprondé e propósito di e reunionnan di kongregashon? Un kos ta sigur, e instrukshon ku nos ta haña na e reunionnan aki ta fortalesé nos pa sigui hasi e boluntat di Dios, i e kompañerismo di nos rumannan ku nos ta disfrutá di dje ta un fuente masha balioso di animashon. (Isa. 54:13; Rom. 1:11, 12) Sin embargo, e propósito prinsipal di e reunionnan ei ta pa alabá Yehova “den e kongregashonnan.” (Sal. 26:12) Reunionnan kristian ta duna nos un oportunidat pa demostrá nos amor pa Yehova i pa ador’é.
3 “Paga Bon Tinu”: Apresio pa e propósito sagrado di nos reunionnan lo motivá nos pa “paga bon tinu” pa nos no desaroyá pokopoko e kustumber di falta reunion pa motibu di kosnan insignifikante. (Efe. 5:15, 16, BPK; Heb. 10:24, 25) Ora di traha boso programa di famia, podisé lo bo por kuminsá na yena e orario di e reunionnan di kongregashon. Anto perkurá pa no laga otro aktividatnan stroba boso di bai. Sòru pa asistensia na reunion ta un prioridat den boso famia.
4 Nos no ta sinti nos konmoví ora nos lesa kon nos rumannan ta vense opstákulonan pa asistí na reunion- i asambleanan? Maske boso sirkunstansianan kisas no ta asina dramátiko, probablemente boso tambe ta enfrentá opstákulo. Satanas ta hasié mas i mas difísil pa e pueblo di Dios adorá Yehova. Sin embargo, bo por tin sigur ku bo yunan lo ripará e esfuerso ku boso ta hasi komo famia pa no laga nada stroba boso di asistí na e reunionnan di kongregashon. Sí, dor di hasi esei lo bo duna nan un regalo spiritual ku nan lo no lubidá nunka.