E Predikashon Ta Yuda Nos Perseverá
1 E Palabra di Dios ta urgi nos pa ‘kore ku perseveransia e kareda ku ta poní nos dilanti.’ (Heb. 12:1) Meskos ku un koredó tin mester di perseveransia pa e logra kompletá su kareda ku éksito, nos tambe tin mester di perseveransia pa haña e premio di bida eterno. (Heb. 10:36) Kon nos ministerio kristian por yuda nos perseverá fielmente te na fin?—Mat. 24:13.
2 Fortalesí den Sentido Spiritual: Dor di proklamá e maravioso promesa bíbliko di un hustu mundu nobo, nos ta mantené nos fe bibu. (1 Tes. 5:8) Ora nos ta partisipá regularmente den sirbishi di vèlt, nos tin e oportunidat pa yuda otro hende konosé e bèrdatnan ku nos a siña for di Beibel. Nos tin e oportunidat pa defendé nos fe, lokual na su turno ta fortalesé nos den sentido spiritual.
3 Pa nos por siña otro hende di un manera efikas, nos mes mester tin un komprondementu bon kla di bèrdatnan bíbliko. Nos tin ku hasi investigashon i meditá riba e informashon. E esfuerso diligente ku nos hasi lo profundisá nos konosementu, fortalesé nos fe i refreská nos den sentido spiritual. (Pro. 2:3-5) Pues, segun ku nos ta purba yuda otro hende, nos ta fortalesé nos mes.—1 Tim. 4:15, 16.
4 Partisipashon seloso den e ministerio ta un parti vital di “e armadura kompletu di Dios,” ku nos tin mester pa nos por para firme kontra Diabel i e demoñonan. (Efe. 6:10-13, 15) Kedando okupá den sirbishi sagrado ta yuda nos tene nos mente enfoká riba kosnan edifikante i ta yuda nos evitá di laga e mundu di Satanas korumpí nos. (Kol. 3:2) Segun ku nos ta siña otro hende e kamindanan di Yehova, nos mes ta ser rekordá kontinuamente pa keda desplegá kondukta santu.—1 Ped. 2:12.
5 Fortalesí dor di Dios: Por último, partisipashon den e obra di prediká ta siña nos dependé riba Yehova. (2 Kor. 4:1, 7) Sin duda esei ta algu hopi benefisioso! Desaroyando e klase di konfiansa ei no solamente ta prepará nos pa kumpli ku nos ministerio, sino tambe e ta prepará nos pa trata ku kualke sirkunstansia ku nos lo por haña nos aden den bida. (Fil. 4:11-13) Sí, siña dependé totalmente riba Yehova ta un faktor klave ku ta yuda nos perseverá. (Sal. 55:22) Pues den hopi manera, e predikashon ta yuda nos perseverá.