Predikashon di e Reino Ta un Privilegio Presioso
1 Diariamente míles di miónes di hende riba tera ta benefisiá di Yehova su provishonnan generoso ku ta sostené bida. (Mat. 5:45) Sin embargo, masha poko di nan tin e privilegio úniko di mustra nan gratitut na nan Kreadó dor di prediká e evangelio òf bon nobo di Dios su Reino. (Mat. 24:14) Kuantu apresio abo tin pa e privilegio presioso aki?
2 Predikashon di e Reino ta onra Dios i ta trese speransa i pas pa hende ku ta sufri debí na e tempu turbulento djawe. (Heb. 13:15) Pa hende ku ta reakshoná positivo riba e mensahe, e ta nifiká bida eterno. (Juan 17:3) Kua karera òf profeshon por ofresé nos e benefisionan ei? Apòstel Pablo a demostrá su apresio pa e ministerio den e manera ku el a kumpli kuné. El a konsider’é komo un tesoro.—Echo. 20:20, 21, 24; 2 Kor. 4:1, 7.
3 Mustra Gratitut pa Bo Privilegio Presioso: Un manera ku nos por mustra apresio pa nos privilegio di prediká ta dor di presta atenshon na e kalidat di nos sirbishi. Nos ta tuma tempu pa prepará un presentashon ku lo motivá nos oyentenan? Tin kosnan ku nos por hasi pa mehorá nos abilidat di usa e Skritura i rasoná ku hende? Nos ta traha nos teritorio asigná kabalmente? Nos por kuminsá i kondusí un estudio di Beibel? Manera ta e kaso ku kristiannan fiel, tantu di ántes komo di awor, un punto di bista korekto di e aktividat aki ta motivá nos, i nos ta apresiá nos privilegio.—Mat. 25:14-23.
4 Ora nos ta lucha ku e efektonan di edat avansá, malesa òf otro sirkunstansianan difísil, ta un konsuelo pa sa ku nos esfuersonan seloso pa partisipá den e ministerio realmente ta di gran balor. E Palabra di Dios ta sigurá nos ku Yehova ta balorá e esfuersonan ei ku nos ta hasi pa sirbié, asta e esfuersonan ku den bista di otro hende kisas no ta impreshonante.—Luk. 21:1-4.
5 E trabou di prediká e Reino ta un fuente di gran satisfakshon. Un ruman muhé di 92 aña a bisa: “Esta un privilegio pa wak atras riba 80 aña dediká n’e sirbishi di Dios—sin niun tiki duele! Si mi por a biba mi bida atrobe, lo mi biba meskos, pasobra en bèrdat, ‘Dios su bondat amoroso ta mihó ku bida mes.’” (Sal. 63:3) Laga nos tambe mustra gratitut pa e privilegio presioso aki ku nos a haña di Dios: E trabou di prediká e Reino.