Edukashon Ku Ta Hiba na Bida
1 Ta masha rekompensador pa mira kon hende su kara ta kuminsá bria segun ku nan ta komprondé e bèrdat for di e Palabra di Dios! E obra di kompartí ku otro hende e konosementu di Dios i di su propósito pa humanidat ta algu ku ta duna berdadero satisfakshon. E edukashon ei por hiba un persona na bida eterno.—Juan 17:3.
2 Dikon E Ta Superior: Awendia edukashon ta ser ofresé hasiendo uso di kasi tur medio posibel i riba tur tópiko ku nos por imaginá. (Ekl. 12:12) Pero tal konosementu no por para banda di e balor di “e echonan poderoso di Dios.” (Echo. 2:11) Akaso e edukashon ku mundu ta ofresé a hasi posibel pa humanidat hala mas serka di e Kreadó i siña konosé su propósito? El a yuda hende komprondé kiko ta sosodé ora ku nos muri òf dikon tin asina tantu sufrimentu? El a duna hende speransa? El a yuda drecha bida di famia? Nò. Solamente mediante e edukashon ku Dios ta perkurá nos por haña berdadero kontesta riba e preguntanan di mas importante den bida.
3 Edukashon divino ta ofresé algu ku ta hasi masha falta den e mundu djawe: formashon di norma- i balornan moral. E Palabra di Dios ta eliminá rasismo i nashonalismo for di kurason di esnan ku ta aseptá i apliká su siñansanan. (Heb. 4:12) El a motivá hende pa legumai tur klase di violensia i “bisti e hende nobo,” es desir, un personalidat nobo. (Kol. 3:9-11; Mik. 4:1-3) Ademas, edukashon divino a duna miónes di hende e fortalesa pa superá práktikanan i karakterístikanan profundamente ankrá ku ta desagradá Dios.—1 Kor. 6:9-11.
4 Dikon E Ta Urgente Awe: Nos Magnífiko Instruktor ta spièrta nos di e nifikashon di e tempu den kua nos ta biba. Su huisionan profétiko ta kontené informashon al dia ku tin ku ser proklamá rònt mundu. (Rev. 14:6, 7) Kristu ta gobernando den shelu, pronto e imperio mundial di religion falsu lo ser destrosá, i e Reino di Dios ta kla pa destruí tur gobièrnu riba tera. (Dan. 2:44; Rev. 11:15; 17:16) Pues, ta urgente pa hende rekonosé Dios su Rei ku ta na mando awor, sali for di Babilonia e Grandi, i invoká e nòmber di Yehova ku fe. (Sal. 2:11, 12; Rom. 10:13; Rev. 18:4) P’esei laga nos partisipá mas plenamente posibel den e obra di kompartí ku otro hende e edukashon ku ta hiba na bida.