Siña Hende Humilde Kana den Dios Su Kaminda
1 Den promé siglo nan tabata referí na e disipelnan di Kristu komo esnan ku ta pertenesé na “e Kaminda.” (Echo. 9:2) Kristianismo berdadero ta un manera di biba. (Pro. 3:5, 6) P’esei, ora nos ta kondusí estudio di Beibel, nos tin ku hasi mas ku djis kompartí konosementu eksakto di loke Beibel ta siña. Ademas di esei, nos tin ku yuda studiantenan di Beibel kana den e kaminda di Yehova.—Sal. 25:8, 9.
2 Amor pa Yehova i pa Hesus: No ta fásil pa hende imperfekto armonisá nan aktitut, nan manera di pensa, papia i aktua ku e boluntat di Dios. (Rom. 7:21-23; Efe. 4:22-24) Sin embargo, amor pa Dios i pa su Yu ta motivá hende humilde pa aseptá e reto aki. (Juan 14:15; 1 Juan 5:3) Kon nos por yuda nos studiantenan di Beibel kultivá e amor ei?
3 Yuda bo studiante komprondé ki klase di persona Yehova ta. Un ruman hòmber a spliká: “Hende no por stima un persona ku nan no konosé, pues for di kuminsamentu mes dje estudio, mi ta siña nan e nòmber di Dios for di Beibel, i mi ta buska oportunidat pa enfatisá e kualidatnan di Yehova.” Un manera ekselente pa hasi esaki ta dor di resaltá Hesus su ehèmpel. (Juan 1:14; 14:9) Ademas, hasi uso di e kuadro di repaso na final di kada kapítulo di e buki Beibel Ta Siña pa yuda e studiante reflekshoná riba e maravioso kualidatnan di Dios i di su Yu.
4 Siña Nan Mediante Bo Ehèmpel: Komo maestro i guia, mediante nos akshonnan nos ta mustra otro hende loke kana den Dios su kaminda ta nifiká. (1 Kor. 11:1) Por ehèmpel, mayoria studiante di Beibel no tin e kustumber di aserká hende straño pa kompartí nan kreensianan ku nan. P’esei anto, kisas nos mester tin pasenshi i e abilidat pa yuda nan kultivá e amor, fe i kurashi ku ta nesesario pa partisipá den e trabou di prediká i hasi disipel. (2 Kor. 4:13; 1 Tes. 2:2) Nos deseo pa guia nos studiantenan lo motivá nos pa ta na nan lado ora nan ta dal e promé pasonan den e ministerio kristian.
5 Bo ehèmpel por instruí bo studiantenan den otro aspektonan importante di e bida kristian. Ora bo ta bishitá un ruman enfermo òf ta kumindá otro hende kordialmente na e reunionnan di kongregashon, nan ta haña un muestra di e amor ku nos tin pa otro. (Juan 15:12) Ora bo ta yuda ku limpiesa di Salòn di Reino òf ta duna yudansa práktiko na otro hende, bo ta siñando bo studiante kon pa sirbi otronan. (Juan 13:12-15) Ora nan opservá ku bo ta hiba un bida simpel, nan ta mira kiko ke men sigui “buska promé e reino di Dios.”—Mat. 6:33.
6 E trabou di siña otro hende for di e Palabra di Dios i di hasi disipel ta enserá hopi esfuerso. Pero ta un gran goso pa mira hende humilde “kana den e bèrdat”!—3 Juan 4.
[Study Questions]
1. Kiko e trabou di hasi disipel ta enserá?
2. Kiko por motivá un studiante di Beibel pa kumpli ku Dios su mandamentunan?
3. Kon nos por yuda studiantenan kultivá amor pa Yehova i pa Hesus?
4. (a) Dikon e trabou di prediká ta un reto pa hopi studiante? (b) Kon nos por yuda nos studiantenan dal nan promé pasonan den e ministerio kristian?
5. Kon un bon ehèmpel ta yuda studiantenan mira loke kumpli ku Dios su mandamentunan ta enserá?
6. Kiko ta e resultado di yuda otro hende sirbi Yehova?