Bo Ta Purba Haña Hende Interesá via Otronan?

Bo ta kondusiendo un estudio di Beibel aktualmente? Pakiko bo no ta puntra e studiante si kualke un di su amigu-, famia- òf konosínan tambe lo tin gana di sa loke Beibel ta siña? Hopi bes studiantenan ta duna nòmber di vários persona. Si e studiante permití bo, lo bo por menshoná su nòmber ora bo bishitá e personanan aki pa ofresé nan un estudio di Beibel. Kisas lo bo por bisa: “[Nòmber di e studiante] ta gusta studia Beibel, i el a pensa ku kisas bo tambe lo ke benefisiá di nos programa di estudio di Beibel grátis.” Kaba, usa e buki Beibel Ta Siña pa demostrá brevemente kon e estudio ta bai.

Si bo tin un studiante ku ta progresando bon, lo bo por anim’é p’e konta su amigu- i famianan ku lo por ta interesá, tokante e areglo di estudio. E por invitá nan pa ta presente ora e ta studia. Òf si esei no ta posibel, lo e por hasi areglo pa abo topa ku nan i mustra nan kon e estudio ta bai. Esaki lo animá e studiante pa kuminsá kompartí su konosementu di Beibel ku otro hende.

Personanan ku bo ta rebishitá regularmente tambe lo por duna bo nòmber i adrès di otro persona interesá asta si nan mes no a aseptá un estudio regular di Beibel ainda. Ora bo ofresé nan un ehemplar di e buki Beibel Ta Siña, lo bo por puntra nan: “Bo sa di un otro persona ku lo tin gana di risibí un ehemplar di e buki aki?”

Mirando kon urgente tempu ta, nos ke usa tur medio posibel pa yuda hende tende i aseptá e bon nobo. Bo ta purba haña hende interesá via otronan?