Kultivá Apresio pa Yehova Su Kualidatnan Inkomparabel
1 Den nos ministerio nos ta hasi mas ku siña hende e bèrdatnan básiko di Beibel. Nos ta yuda nan siña konosé Yehova su personalidat i kultivá apresio pa su kualidatnan inkomparabel. Ora hende sinsero siña e bèrdat tokante Dios, esaki tin un efekto profundo riba nan i ta motivá nan pa kambia nan bida pa nan por ‘kana na un manera digno di Yehova i agrad’é den tur sentido.’—Kol. 1:9, 10; 3:9, 10.
2 Nos Buki Nobo di Estudio: For di su kuminsamentu e buki Beibel Ta Siña ta hala atenshon na Yehova su kualidatnan. For di den e promé kapítulo e ta kontestá e preguntanan: Dios ta realmente interesá den bo?, Kon Dios Ta?, i Ta posibel pa hala serka Dios? Ademas, e kapítulo ei ta resaltá Yehova su santidat (§10), su hustisia i kompashon (§11), su amor (§13), su poder (§16), su miserikòrdia, grasia, pasenshi, fieldat i e echo ku e ta kla pa pordoná (§19). Den un resúmen, paragraf 20 ta bisa: “Mas bo siña tokante Yehova, mas real lo e bira pa bo i mas motibu lo bo tin pa stim’é i sinti ku bo tin un amistat será kuné.”
3 Kon nos por usa e buki Beibel Ta Siña pa yuda studiantenan hala serka Yehova? Despues di konsiderá un paragraf ku ta resaltá un kualidat di Dios, nos lo por puntra e studiante: “Kiko esaki ta siña bo di e personalidat di Yehova?” òf “Kon esaki ta mustra ku Dios ta interesá den abo personalmente?” Usando tipo di preguntanan asina de bes en kuando durante e estudio, nos ta siña nos studiantenan meditá riba loke nan ta siñando i yuda nan haña mas apresio pa Yehova su kualidatnan inkomparabel.
4 Usa e Kuadro di Repaso: Na final di kada kapítulo, animá e studiante pa komentá ku su propio palabranan riba kada punto den e kuadro “Loke Beibel Ta Siña.” Hala atenshon na e tekstonan menshoná. Pa saka afó loke tin den kurason di e studiante, de bes en kuando lo bo por puntra: “Kiko bo ta pensa di loke Beibel ta siña riba e punto aki?” Dor di hasi asina, bo ta enfatisá e puntonan prinsipal di e kapítulo i tambe bo ta komprondé bon kla kiko e studiante realmente ta kere. Esaki lo yuda e studiante kuminsá desaroyá un relashon ku Yehova.