Un Vidio Ku Ta Pone Bo Pensa Seriamente
“E vidio aki ta ègt pone bo para pensa!”
“El a konmové mi mesora!”
“Mi hemut a yena!”
1 Ta asina bo a sinti despues ku bo a wak e vidio Hóbennan Sa Puntra—Kon Mi Por Haña Berdadero Amigu? pa promé biaha? Algun aña pasá, un ruman hòmber yòn tabata pasando den un periodo difísil, i tur esei pa motibu di e amigunan ku el a skohe. Nan a pon’é pèrdè interes den e bèrdat, i el a pèrdè su relashon ku Yehova. Nèt e tempu ei e vidio Berdadero Amigu a kaba di sali. E hóben a skirbi: “Kada bes ku mi a wak e vidio, awa a basha for di mi wowo. Mi a gradisí Yehova pa e yudansa ku a bini nèt na tempu.” E vidio a motiv’é pa kambia su estilo di bida i buska bon amigu. El a agregá: “Ta bisto ku boso ta bon na haltura di loke ta afektá hóbennan.” Mayornan i hóbennan, pakiko boso no ta wak e vidio atrobe durante boso siguiente estudio di famia? Stòp e vidio despues di kada parti, i konsiderá huntu e preguntanan den e siguiente paragrafnan na un manera franko i onrado.
2 Introdukshon: Kiko ta un berdadero amigu?—Pro. 18:24.
3 Opstákulo Ku Ta Stroba Amistat: Kiko bo por hasi si bo ta sinti ku hende ta laga bo afó? (Fil. 2:4) Dikon bo mester ta dispuesto pa mehorá bo personalidat, i ken por yuda bo hasi esei? Kiko lo krea oportunidat pa bo haña mas amigu, i na unda bo por haña nan?—2 Kor. 6:13.
4 Amistat ku Dios: Kon bo por kultivá un relashon mas íntimo ku Yehova, i dikon e esfuerso pa hasi esei ta bale la pena? (Sal. 34:8) Ken ta den e mihó posishon pa yuda bo fortalesé bo amistat ku Dios?
5 Mal Amigu: Ki tipo di hende ta mal kompania? (1 Kor. 15:33) Kon mal amigu por kaba ku bo spiritualmente? Kiko bo ta siña di e relato bíbliko tokante Dina?—Gén. 34:1, 2, 7, 19.
6 Un Drama Moderno: Kon soledat a afektá Tara? Kon el a purba mustra ku no tin nada malu den su amistat ku hóbennan mundano? Den ki situashonnan peligroso nan a hink’é? Dikon su mayornan no a ripará ku e tabata den peliger, pero kon nan a kambia nan aktitut pa por a yud’é rekuperá den sentido spiritual? Kon un ruman muhé pionero a resultá di ta un berdadero amiga pa Tara? Dikon kristiannan mester hasi kaso di Proverbionan 13:20 i Jeremias 17:9? Ki lès importante Tara a siña?
7 Konklushon: Ki lèsnan bo a siña for di e vidio aki? Kon bo por us’é pa yuda otro hende?—Sal. 71:17.